Dörpelmaeg op zuik nao nuuj lede

2019

Wae kènt ze neit in ’t Zittesje, de dames in ‘t lange blauwe kleid, geroete sjòlk en pelerine? Dat zeen de dames van de Zitterd ‘Dörpelmaeg’. Zie zètte zich vol euvergave in veur ’t in sjtandj hawte van Zittesje tradieses, in ’t bezunjer de Zittesje Vastelaovend. Mit raad en daad sjtaon zie vaerdig, meistal achter de sjerme en op de achtergrondj.

Rondj 1900 moosjte de meiste dames flink potse en sjtrobbe bie rieke femiejes. Dees ‘dörpelmaeg’ hawwe ’t neit gemekkelik. De dörpel aan de veurdeur waar ’t visitekaertje van de bewonesj en moosj daorom altied op en top blinke. ’t Beroup sjtorf in de letterlikke zin oet. De naam bleef behauwte, mèr dan waal via eine omwaeg. Rondj de jaore ’50 van de veurige eeuw haw Zitterd ein aantal dameskeigelvereiniginge. Op de bane van ’t legendarische hotel ‘De Zwaan’ aan de Brandjstraot woort sjportief om de punte gesjreeje. Altied waar dao eine geweldige sfeer. Pienlik waar dan ouch de sjloeting van de bane in 1961. De dames verlaore hunne hobby, mer hunne leifde veur de Zittesje Vastelaovend en de ongerlinge bandj bleke de sjleutel tot de oplossing. Op 11 November 1961 waar de oprichting van de ‘Dörpelmaeg’ ein feit. Veural door hun deilname aan de Zittesje optochte gruijde de naam. Mènnig Eerewimpel hingk in de priezekas. Ein van de hoogtepunte in ’t besjtaon is ’t bezuik aan Palies Soestdijk in 1973, wo zie bie gelaeg van de verjaordaag van toenmalig Keuningin Juliana höbbe deilgenomme aan ’t destieds tradisjoneel en populair defilé.

De Dörpelmaeg in Groote Vastelaovesoptoch 2019

Lid waere?
Taegeweurdig zeen de dames van de dörpelmaeg bekènd van tal van aktiviteiete. Ze loupe veurop in de Kènjeroptoch om symbolisch de waeg vrie te maeke veur de Marotte en de Sjtadsprins. In de Groote Vastelaovesoptoch vorme zie jaorliks eine leuke en humorvolle grop. Wiejer helpe zie sjtadskapel ’t Trumke en ’t Tröötje bie de jaorlikse vastelaovesaovend veur gehandicapte, helpe zie ’t Optoch Kommitee mit de verkoup van de vaenkes ‘Veer sjteune d’n Optoch’ en haole zie geldj op veur de Kènjeroptoch. Ouch bezuike zie trouw Prinseresepsies en assistereiere zie mit hawf vaste mit ’t oetdeile van Krombreudjes. Ouch numme de dörpelmaeg deil aan ’t Alternatief Sjöttefees en doon tal van vereiniginge noots tevergaefs ein beroup op hun.

De dörpelmaeg höbbe momenteel zeve lede en zouwe gaer get groter wille waere. Dames mit gevuil veur Zittesje tradieses en folklore, mit Vastelaovend in ’t bezunjer, die lid wille waere kènne kontak opnumme mit Mirjam Budding, Jan van Stevensweertsjtraot 9, 6137 AR Zitterd. Kontak is muigelik telefonisch via 06-12403202 en per mail: mirjam.bugging@home.nl

Bron en foto’s: de Dörpelmaeg