De Pappegey vlug veur de 138e keer oet!

2019

Donderdig 21 Fibberwarie zal Sjtadsprins Rob I in besjlaote krèngk ‘t eesjte exemplaar van ‘De Pappegey’, ‘t offesjeel jaorblaad van Sjtadsvastelaovesvereiniging De Marotte Zitterd, ontvange. Dit kwalitatief glossy magazine, ongertössje de 138e jaorgangk, sjteit vol mit foto’s, humoristische gebeurtenisse en gekke onwaorhede. Mer ouch serieuze artikele euver onger angere Sjtadsprins Rob I, dae zelf versjèllende jaore deil haet oetgemaak van de redaksie van De Pappegey. Vanaaf kommend weekend kènt jeederein sjmulle van de sjpraokmakende artikele in de 138e jaorgangk van De Pappegey.

Tradisjoneel zal de redaksie de inhoud geheim hawte, mer zeen zie waal bereid om ein tipke van de sjpraekwoordelikke sjluier te lichte. Dit om de väölzijdigheid aan ongerwerpe onger de aandach te brèng en de laezesj nuujsjierig te make. Natuurlik is d’r väöl aandach veur Sjtadsprins Rob I, ‘t 5×11 jaorig jubbelei van ’t Optoch Kommitee Zitterd, versjèllende foto’s oet de auw doos en väöl foto’s die de kleureprach en variase van d’n eeuwen-awwe Zittesje Vastelaovend typere. De inhoud is dan ouch heel verrassjend! Ouch de jeug is betrokke bie ’t femiejeblaad. Kènjer van OBS de Sjtadssjool höbbe vol iever mitgewirk aan ’t gedeilte veur de kènjer. De artikele mit hauf waorhede en artikele die mit ein sjörkar zout genomme motte waere ontbraeke nutuurlik ouch neit. Tot sjlot onthult ’t blaad weier tal van senzasjoneel zake.

De Pappegey is dankzij de väöle sjponsore gratis verkriegbaar op versjèllende plaatsje in Zitterd. Beveurbeeld bie de Marottewinkel (damesmode Van Neer Eyckeler, Brandjsjtraot), Boukhanjel Krings (Brandjsjtraot), Bruna Sittard (Gruuzesjtraot), Hendriks Carnaval (Riekswaeg Noord), ’t kallebeske (Sjteivig), AS Lunchies (Walsjtraot), VVV Limburg (Rosmeulesjtraot), Eveline Mode (Dempseysjtraot Lömmericherveldj), Gijsen Optiek (Tempelplien), Shell Dr. Nolenslaan (Dr. Nolenslaan), Avia Leyebrouk (Leijebroukerwaeg), Jumbo Sittard (Romeinensjtraot), Albert Heijn (Bröksjtraot), Honings Roubrouks (Heisjtraot), PLUS Boudy Postma (De Samaritaan), Fotografie Ton Dirkx (Paesjsjtraot)

Tot sjlot:
Tips, nuuts of gekke anekdotes zeen altied wilkom via pappegey@marotte.nl. Wae wèt haet gans Zitterd ’t in de volgende edisie van De Pappegey waal euver wat geer höb ingesjik!

Bron: De Marotte Zitterd
Foto: VastelaovendZitterd – RBZitterd