De Donderdig veur de Vastelaovend is tradisjoneel de daag van de Auw Wiever. Dees sjlachtende maskes zeen saoves pès deip in de nach in en rondj de zittesje kaffees te venje. Op de Mert organezeiert ‘t Convent van Neit Prinse weier de Nach van ‘t Zittesj Auwt Wief. Vanaaf 20.33oere trekke de Neit Prinse mit ein mobiel podium rondj en ontvange zie op ein ludieke meneier de Auw Wiever. Taeves zulle versjèllende artiste op ’t podium versjiene.
Alle ‘Auw Wiever’ kènne zich op ’t podium prizzenteiere en hun sjpel laote zeen aan de luuj. De Neit Prinse zulle alle Auw Wiever vakkundig zjureiere wobie zie kans make op prieze es ’t Sjoonste Auwt Wief, Sjoonste sjpel, Sjoonste grop, Sjerpste Auwt Wief, Meis Zittesj Auwt Wief en ein aantal sjpisjaal prieze. Alle Auw Wiever die zich prizzenteiere kriege taeves ein medaaje van de Neit Prinse. Rondj middernach wurt de ‘oetsjlaag’ bekend gemaak. Dit alles sjteit garant veur de neudige hilariteit, ein grote dosis flauwekul, ‘sjaele zeiver’ en Zittesje Laammaekerie.
In kafee ’t Duvelke aan de Helsjtraot hilt de Marottekapel häör tradisjoneel Auw Wiever konzer. Zie vermake vanaaf 21.11oer de Auw Wiever en anger laammaekesj mit veural (auw) Zittesje Vastelaovesleidjes.
Foto: Ton Dirkx
