De Marotte opzuik nao historisch materiaal

2019

Sjtadsvastelaovesvereiniging De Marotte is opgerich in 1881. De vereiniging kènt vanwaege de laeftied en de initiatieve ein rieke historie. Jaomergenog is in de lange periode van besjtaon väöl materiaal veur ’t naogesjlach verlaore gegange. Gelukkig zeen ouch väöl van de archieve en bezunjer zake veilig ongergebrach bie ’t Euregionaal historisch centrum (EHC), ’t veurmalige gemeintearchief. Gereigeld kriege De Marotte historisch waerdvolle sjpulle aangebao van luuj, beveurbeeld bie verhoezing of naolatensjap. Daorom is gereigeld aandach hieveur belangriek.

Marot Jo Willems is momenteel de archivaris van De Marotte. Same mit versjèllende anger vriewilligesj vèngk hae ’t neit allein leuk om kènnes de numme van väöl zake oet ’t verleje, hae is ouch van meining dat zoväöl muigelik materiaal mit de kènnis en achtergrondj veur ’t naogesjlach veilig gesjtèld mot waere. Jo Willems: “Veer kriege sjpulle aangedrage en gesjonke door luuj mit ein Vastelaoveshart, die bang zeen dat dit in de toekoms verlaore zal gaon. Veer höbbe fotoalbums, väöle knipsels oet gezette, losse foto’s, buikskes, ordes en kleinere ‘prullaria’, die veer nog motto documenteiere en archiveiere. ’t Grootste gedeilte wurt opgesjlage in ’t EHC, wodoor ’t sjtraks veur jeederein toegankelik is. ’t Oetzuike is väöl, mèr sjoon werk. Soms ontdèkke veer bezunjere zake. En soms dènke veer bezunjer zake te zeen taege gekomme en dan bliek dat nao einig sjpeurwirk neit zo te zeen. Dan sjpeure veer weier wiejer”.

Muigelik dat dit artikel mee luuj deit beseffe dat ouch zie messjien besjikke euver veur ’t naogesjlach interessante Zittesje Vastelaoveshistorie? De Marotte roupe hun op om ens vrieblievend kontak op te numme via info@marotte.nl of telefonisch via 046-4521567. Went: “Baeter ellef keer teväöl gebled, dan eine keer te weinig!”.

Bron: De Marotte Zitterd
Foto: De Marotte Zitterd