De Marotte op zuik nao ‘nuuts’ veur jaorblaad De Pappegey

2020

Op 13 Fibberwari 2020 versjient de 139e edisie van ‘De Pappegey’, ’t jaor- en kolderblaad van Sjtadsvastelaovesvereiniging De Marotte Zitterd. Ouch dit jaor zal de Pappegey weier versjiene in de vorm van eine glossy. De redaksie van De Pappegey is op zuik nao ‘nuuts’ veur dees edisie.

Naeve ’t offisjeel gedeilte is d´r weier väöl plaatsj ingeruump veur anekdotes, foto’s mit ein gek verhaol en kolderieke verhaole mit ‘sjaele kal’. Hieveur vraoge De Marotte de mitwirking van ’t pebliek. Höb geer get geks of leuks mitgemaak? Höb geer ein ‘gekke’ of ‘lachwekkende’ foto? Sjrief ’t op, meel ‘t of sjtuur ’t op nao de redaksie van de Pappegey. Tekste ‘t leifste in ‘t Zittesj Plat, mèr moch geer ’t Zittesj neit (gans) machtig zeen, dan kent ’t ouch in ’t Nederlands en zal de redaksie ‘t vertale.

Dit jaor is de redaktie in ’t bezunjer geïnteresseierd in humoristische en kolderieke anekdotes en foto’s euver en van de nuuje Vors Marot Jan Janssen of euver de zös nuuj lede van de Wieze Raod van De Marotte. Daonaeve ein oetdrukkelikke oproup aan jeederein dae zich altied aafvreeg worom ein leuke anekdote neit vermeld sjteit? Omdat de redaksie dees neit ontvange haet! Dus daorom: Sjtuur in!

Sjture of meele kent nao:
Sjtadsvastelaovesvereiniging De Marotte Zitterd
t.a.v. De Pappegey
Postbus 256, 6130 AG Sittard
of via e-meel nao pappegey@marotte.nl

De redaksie behilt zich ’t rech veur om inzendinge waal of neit te plaatsje. Hie euver vèngk gein korrespondensie of trökkoppeling plaatsj.

Bron: De Marotte Zitterd
Foto: De Pappegey 2019