Op de 11de van de 11de äöpend Sjtadsvastelaovesvereiniging De Marotte Zitterd ’t nuuj Vastelaovessezoen. De äöpening vèngk vanaaf 18.30oere plaatsj op ’t sfeervolle Kloosterplien in Zitterd. Naeve De Marotte Zitterd zulle ouch de Vastelaovesvereiniginge van ‘Groot-Zitterd’ mit Prinse en Prinsesse aanwezig zeen. Natuurlik wurt gezörg veur ein drènkske.
Om 18.30 oere sjtart ’t pregram mit Kindcentrum Sittard mit ’t leidje ‘Veer doon de Alaaf’, mit aansjloetend ’t door Cheyenne gezonge Marotte Tienerleidje 2020 ‘Veer liken Vastelaovend’. Vervolges ein muzikaal parade van de nuuj sjlaagesj, die te vénje zeen op de nuuj Marotte CD ‘Mènningmaol roup ich alaaf’. De tittel van de CD verwis nao de door René Dirkx gezonge sjlaager 2020. De nuuj Marotte CD is vanaaf begin December te koup.
Äöpening
Wie gebroekelik zeen d’r bie de äöpening van ’t sezoen versjèllende offesjeel momente. Zo zal regeierend Sjtadsprins Rob I de eesjte Greutsje Pin 2020 kriege oetgereik door ex-sjtadsprins Ruud I. ’t Vastelaovessezoen wurt offesjeel geäöpend same mit De Mander en Zitterd Same. Dit geit gebeure mit verrassjende illemènte, wobie dankbaar gebroek wurt gemaak van de meugelikhede van de sfeervolle omgaeving van ’t Kloosterplien.
Muzikaal klanke zeen d’r ouch van drie LVK wènnesj: De Toddezèk (drievoudig LVK wènnesj), De Geliënde (LVK winnaar 2018) en de LVK wènnesj van 2019: Hoondervel. Muzikale toppesj op deze sjpisjale aovend! Wiejer zal ’t jeugdige duo Sjtóm Toeval hun nuut LVK-leidje zènge en zo-es in Zitterd ein bekend gezegde zaet: ‘En nog mee, en nog mee en nog väöl mee”.
Door ’t tiedsjtip vruig op de aovend is ’t zelfs muigelik is om mit de kènjer nao de äöpening van ’t sezoen te komme. Veur de ganse aovend is jeedeein mit ein hart veur d’n Eeuwe awwe Zittesje Vastelaovend van harte oetgeneudig. De entree is gratis! Einigzins verkleid komme zörg veur eine richtige Vastelaovessfeer, mér is natuurlik neit verplich.
Bron: De Marotte Zitterd
Foto: Ton Dirkx
