Aankommende zondig, 1 September, véngk veur de 46e keer ‘t Alternatief Sjöttefees Zitterd plaatsj. Dees parodie op de tradisjonele sjöttesjfeeste zal dit jaor verhoeze nao ein nuuj lokase. In ’t verleje vonj ’t Alternatief Sjöttefees onger anger plaatsj op lokases es de parkeierplaatsj Haspelsesjtraot, Serviamplein, Jardin d’Isabelle, de Ursulinenhaof en de letste jaore op Cour Solanus.
De nuuj lokase wo ’t Alternatief Sjöttefees zal plaatsj vènje is de sjootsvèlje tössje de grach langs de Begienehaofwal en de baek aan de Ligne. Doordat dees lokase groter is dan de veurige lokases is ’t aantal deilnummende vereiniginge dit jaor kènne oetgebreide van 16 nao 20. De vereiniginge die dit jaor hun debuut make op ’t Alternatief Sjöttefees zeen: Klup de Sjnaake, de ex-missen van ’t Oktoberfeest Sittard, Skybox 24 en Sjötteklup ’t sjöt neit op. Nuuj is ouch dit jaor dat ’t muigelik is om te pinne bie de bonneverkoup.
Pregram:
Alle alternatieve sjötterieje, die veural besjaon oet Zittesje (Vastelaoves) vereiniginge en Zittesje kapelle, verzamele zich vanaaf 12.00 oer op ‘t feesterrein en prizzenteiere zich vervolges bie ’t defilé op ein ludieke meneier aan de zjurie en Keizer Leòn Kaminski van kapel Aafsjlaag Zitterd. Nao aafloup van ‘t defilé trekke rondj 13.30 oer alle deilnummende alternatieve sjötterieje in de optoch door de bennesjtad. De optocht trèk via de volgende route: Sjootsvèlje, Daeke Tijssesjtraot, Begienehaofsjtraot, Lömmerichtersjtraot, Mert, Auw Mert, Kloosterplien en via de Daeke Tijssesjtraot trök nao de sjootsvèlje.
Aansjloetend aan de optoch beginne op ’t feesterrein rondj 14.30oere de sjeitwedsjtrieje. Dit geit neit wie bie ein tradisjonele sjötterie op bölkes of eine houte vogel, mer op ’t Alternatief sjöttefees gebeurt dit door mit ein wèndjbuks op eine tempexvogel te sjeite. Dat sjteite is al ein kunst opzich wo ouch ’t neudige gelök bie kump kieke.
In de eesjte kavelrunj wurt door alle vereiniginge ongerling gesjaote om de Keuningstitel. Daegeine dae ’t letste sjtökske van de vogel wit aaf te sjeite kroont zich pès keuning. Aansjloetend sjeite in de tweede kavelrunj alle keuninge taegen-ein om de Keizerstitel. De keuning dae dan de voogel aafsjöt maag zich ein jaor langk Alternatieve SjötteKeizer van Zitterd nuime. De vereiniging woo de Keizer lid van is haet de eer om volgendjaor ‘t Keizersfees op de zaoterdigavond veuraafgaond aan ’t Alternatief Sjöttefees te organizeiere.
Keizersfees
Op de zaoterdigaovend veuraafgaond aan ’t Alternatief Sjöttefees is tradisjoneel ‘t Keizersfees. Dit jaor wurt ’t Keizersfees georganezeiert door kapel Aafsjlaag Zitterd ter eere van hunne Keizer Leòn Kaminski. Extra bezunjer is dat kapel Aafsjlaag Zitterd dit jaor hun 25jaorig besjtaon viert. Dubbel fees dus pakke zie ouch extra oet.
’t Keizesjfees in Godfather-sjtiel vèngk op zaoterdig 31 Augustus e.k. plaatsj in ’t Maria park op de Auw Mert. Tössje 19.00 en 21.00oere is ein resepse, vanaaf 21.00oere is eine feesaovend mit meziek van de band High Voltage mit o.a. Gerald van Gemert en DJ Sepp.
Zowaal ’t Alternatief Sjöttefees op zondig es ’t Keizersfees op zaoterdigaovend is veur jeederein, dus ouch neit deilnummesj aan ’t Alternatief Sjöttefees, Gratis toegankelik.
Mee infermase is te venje op de Faceboukpagina van ‘t Alternatief Sjöttefees Zitterd en op de Faceboukpagina van Kapel Aafsjlaag Zitterd.
Foto’s: Sittard-geleen.nieuws.nl (1) / VastelaovendZitterd – RBZitterd (2) / Kapel Aafsjlaag Zitterd (3)
