Op Zaoterdig 25 Augustus e.k. is ’t Zittesj vastelaovesleidjes Konkour (ZVK) en wurt de Zittesje Vastelaovessjlaager 2019 gekaoze. De lokase is dit jaor de Sjpeigeltent ‘Don-Vivant’ op de sjootsveljer bie ’t Sint Rosa-festival. De deure van de sjpeigeltent äöpene vanaaf 19.33 oer en de verkeizing begint om 20.33 oer. Bie de ingank kènt jeederein ein teksbuikske mit sjtömformeleier en pen koupe veur €3,50 per bezuiker.
Tradisjoneel begint de aovend mit ein trökblik op ’t aafgeloupe sezoen. Om de zaal alvas in de sjtömming te brenge zèngk ’t duo Gein Haor Baeter nog eine keer de Marottesjlaager 2018 ‘Veer zeen Zitterd’. De sjrievesj Ed Geilen en Petro Willems zulle aansjloetend de Thei Hunnekens Wisseltrofee inlevere.
De meziek van de leidjes is veuraaf opgenomme, mer de leidjes ware waal laof gezonge door Zittesje zengesj. De leidjes die dait jaor in de fianle van ’t ZVK sjtaon in volgorde van optraë:
- ‘Nog eine’ van Jack Vahsen
- ‘Einzelgänger’ van Pascal van Teeffelen
- ‘Mit de meziek mit’ van het duo Ed Geilen en Petro Willems
- ‘Volle Poele’ mit teks van Jan Dieteren en meziek van Paul Erens
- ‘Zolang mien vuit mich kènne drage’ van het duo Sjon Smeets en Gian Prince
- ‘1,2,3 Vastelaovend’ van Thei Wessels
- ‘Zuustet zitte in Zitterd’ van Hans Wijnands
- ‘’t Aller, aller, aller’ van Theo Weijman en Mark Willems
- ‘’t Is eine jóng van ós’ van Guus Steinen
- ‘Same viere’ van Maurice Indemans
- ‘Wae haet de meiste sjpas’ van Ger Muijres
- ‘Mit de vastelaovend’ van Phil Schaeken
De zjureiering vèngk plaatsj door alle aanwezige en ein vak-/prominentezjurie.
Nao ein pauze es de sjtömme waere geteld wurt de oetsjlaag bekend gemaak. ’t Leidje dat op de eesjte plaatsj eindig wurt de Zittesje Vastelaovessjlaager veur ’t Vastelaovessezoen 2018-2019. Aan de sjreiver/komponis van de wennende sjlaager reike Sjtadsprins León I en Marianne Hunnekens – de Kok de Thei Hunnekens Wisseltrofee oet. Dees trofee is vernuimp nao de väöl te vruig euverleje Thei Hunnekens, dae bekend sjteit es de grondjlegger en jaorelangk drievende krach waas achter ’t oetbrènge van Zittesje Vastelaovesleidjes op LP’s en CD’s.
Bron: De Marotte Zitterd
Foto: Arjan Krijntjes