Vastelaovesdaendig is ’t tradisjoneel de daag van de mechelkes en sjnaake mit ’t Appelesienesjmiete. Vanaaf ongeveer 13.33oer trekke de maskes en ‘hoeraes’ weier euver de mert en door de bènnesjtad om appelesiene te sjmiete nao de mechelkes en sjnaake. De kreet ‘Appelesiene, appelesiene, appelesiene’ zal weier vööl te heure zeen, went wae ‘t helste ‘Appelesiene’ ruip krig de meiste appelesiene gesjmeete.
‘t appelsienesjmiete is al ein gebroek oet de vruige gesjiedenis van de Marotte en waar bedoeld es extra vitamines om de res van de wentjer door te komme, ‘t Appelsienesjmiete is daomit ein van de auwdste tradiesies van Zitterd. Noe is ’t nog altied een leuke en gezonje Vastelaovestradiese veur de kènjer.
Dit jaor wurt de jaorelange tradiese van ’t Appelesienesjmiete versjterk mit hedendaagde aktiviteite. Op ein podium op de Mert zal DJ Lars zörge veur Vastelaovesmeziek aafgewisselt mit versjéllende optraës. Zo zal onger anger Sterre Cuypers ’t Marotte Tienerleidje ‘Veer gaon d’r veur’ ten geheure brènge.
Ouch nuuj is dat de sjoonst verkleide kénjer waere beloond mit ein workshop ‘Appelesienesjmiete’. De aanwezige ervaren Appelesienesjmietesj zulle de kénjer oetzuike en mitnumme nao ’t podium op de Mert.’De beste jeugdige kandidaat maag zich een jaor langk ‘Appelesienesjmieter van 2018’ nuime en krig ein sjoon herinnering. De Klup Ummer Naat, die besjteit oet (auwt) lede van de Zittesje Brandjwaer en femieje, zal mit ’t Appelesienesjmiete op de Mert prezent zeen mit eine bakfits wo kénjer de gevange appelsiene gratis kenne laote oetpaesje veur ein lekker en fris glaeske appelesienesaap.
Maske Begrave
Grootste verangering op de Vastelaovesdaensdig is ’t Maske Begrave dat dit jaor eine gans nuuje opzét krig. Zo zal ’t Maske al eerder op de aovend waere begrave en neit mee oppe Kolleberg.
’t Maske Begrave sjtrat om 18.11oere es Culturele vereiniging De Mander en Sjtadsprins León I ’t Maske gaon aafhaole dat op de 11de van de 11de door de toen regeierende Sjtadsprins Bart II is opgehange aan ’t balkon van kafee De Kroon op de Mert. Aansjloetend volg ein gevarieiert pregram dat om 21.33oer de Vastelaovesvierders nao ’t Kloosterplien bréngk. Op ’t Kloosterplien zal ’t Maske dan op ein nuuj en eigetiedse meneier waere begrave es teike dat de Vastelaovend (bienao) is gedaon.
