Op 20 Jannewarie jl. is León Kaminski geinsjtalleiert es 87e Sjtadsprins van Zitterd. Vanaaf dat moment sjtarte ein periode wo in hae weinig rös zal kriege. De meis oeteinloupende take, samehangend mit zien functie, haet León ongertössje in zien agenda sjtaon.
Ein van de aafsjpraoke die de Sjtadsprins genoteiert haet is de voetbalwedsjtried Fortuna Sittard taege FC Emmen op vriedigaovend 26 Jannewarie. Waarsjienlik sjtong dees wedsjtreid al in ziene agenda veur zien Prinssjap. Echter hoewaal hae supporter is van Fortuna Sittard is hae net get mee troew lid van de Philhermenie en die ripperteiert altied op vriedigaovend. Es Fortuna, de kopluiper in de Jupiler League, op eine angere daag dan vriedigaovend sjpeelt, dan is León van de pertie same mit zien vrundjin Evelien. Zie is zelf aktief voetbalster is bie OVCS-dames en fantiek supporter van Fortuna. Taeves begeleid zie, same mit häör vader, gereigelt de ballejonges bie Fortuna.
León verheug zich bezunjer op de wedsjtreid van vriedigaovend. Veuraafgaond aan dees wedsjtreid in de Jupiler League wurt namelik eine jongesdruim wirkelikheid. Hae haet dan de eer op de middesjtip en in ’t leich van de maetesjhoge leichmaste van ’t Fortuna stadion de aaftrap van dees wedsjtreid te verrichte. Veur León ein neit alledaagse taak. Meinig supporter op de tribunes zal waarsjienlik sjeloesj zeen en haope om ooit éns Sjtadsprins te waere en dan de aaftrap te mage verzörge!
Bron: De Marotte Zitterd
Foto: studio VR/Ivo Delahaye