Op zondig 19 Augustus e.k. viert de bekende Zittesje Sjtadskapel ’t Trumke en ’t Tröötje häör 44 jaorig jubbelei. Dit jubbelei wurt gevierd in de Kloostertuin op de vlonder achter Hotel Merici. Tösje 14.00 en 16.00 oere is ein resepse veur geneudigde en belangsjtèllende die zal waere gevolg door ein fees mit de bekende band Batôn Rouge en DJacky.
Historie
De kapel is in 1974 opgerich door ein aantal vrunj in de jongere sociëteit ’t Kelderke. De meiste lede koosjte in dae tied amper ein noot sjpele.
In de jaore ’70 en ’80 waar ’t make van Vastelaovesmeziek en ’t deilnumme aan de Vastelaovescultuur in en rondj Zitterd ’t belangriekste doel. Mit eine grote grop, femieje en vrunj woort jaorliks deilgenomme aan de grote Zittesje Vastelaovesoptoch mit ein grop van waal 120 persone, wobie väöle eesjte en Ere Prieze zeen gewonne. Ouch aan de haufvaste viering in ’t Belzje Hasselt woort in samewirking van de bekende Hasseltse grop ‘De Koekerellen’ teentalle jaore intensief mit gedaon.
De kapel verouverde al sjnel ein vaste plaatsj in ’t Vastelaoves- en culturele mezieklaeve in Zitterd en organezeierde väöle jaore ’t Auwt Mènkesbal, eesj in kafee ’t Sieske aan de Riekswaeg Zuid, later in ’t Gulickshoes en kafee ’t Menke aan de Pötsjtraot. Ouch woort al sjnel gesjtart mit de financiering van de organezase van ein carnavalsbal veur luuj mit ein geistelikke beperking door sjtichting Sportinstuif, get dat tot op de daag van vandaag nog ummer wurt veurtgezat.
Limburgs kampioensjap Zaatehermienkes
Versjellende maole haet de kapel deilgenomme aan ’t Limburgs kampioensjap Zaatehermienkes, ’t LKZH. Naeve 2de plaatsje woort in 2004 de eesjte plaatsj behaold. Dao-op organezeierde de kapel in 2005 ’t LKZK mit ein grootsfees in de Zittesje Sjtadssjporthal wobie in 4 daag 10.000 bezuikesj woorte geteld.
In de late jaore ’70 waar de kapel väöle jaore ’t hoesorkes van Fortuna Sittard, womit ’t kampioensjap van de eesjte divisie, de promosie en de baekerfinale in Rotterdam intensief woorte belaef. In 1978 woort in de studio van Jan Theelen same mit de Fortuna seleksie de single ‘Nao veure Fortuna’ opgenomme, nog ummer ’t offesjeel clubleid van de club.
Bie ’t gelaeg van ‘t 2×11 jaorig jubbelei woort ’t inisjatief genomme veur ein permanente hommage aan de Zittesje Zaate Hermeniekes. ‘t bronze sjtandjbeeld ‘Tröötemènkes’, ontworpe en gemaak door de bekende Limburgse kunstenaer Sjir Jacobs kreeg ein plaatsj op de Paesjstraot vlak bie de Mert.
Kanon van het Balkon
In ’t jaor 2003 koos de kapel ’t bekende restaurant de Limbourg op de mert es hoeslokaal en in 2004 woort van dao oet begonne mit de organezase van ’t eesjte ‘Kanon van ’t Balkon’ op de zaoterdig veur de Vastelaovend. Ongertössje haet de kapel dit 15 jaor georganezeierd en is ’t Kanon van ’t Balkon oetgegruijt pes ein van de hoogtepunte van de Zittesje vastelaovend.
Saer ’t jaor 2000 is ’t muzikaal niveau van de kapel mit sjpronge veuroet gegange en is ‘t rippertwaar verangerd nao Dutsje volksmeziek en mit name nao Egerländer en Tiroler meziek. In de aafgeloupe 5 jaor is de kapel 3x aafgereis nao Tirol veur ein konzèrreis nao Söll, Ellmau en Kitzbühel. Greutsj waar de kapel dan ouch om aafgeloupe jaor ein oetneudiging te kriege veur de muzikaal omliesting van de Oktoberfeesmis in de Zittesje basiliek, get dat veur de kapel ein bezunjere ervaring waar en die op ein sjoon wieze woort ingevuld.
Op dit moment besjteit Sjtadskapel ’t Trumke en ’t Tröötje oet 18 lede en de Besjirmheerr. Twee van dees lede zeen al lid van de vereiniging saer de oprichting in 1974: Wim Clerx en Martin Pfeifer. Zie zulle es 4 x 11 jaorige jubbelarisse op ein gepaste wies in ’t zönke waere gezàt. Ouch de Besjirmheer Harie Fiddelers, is al lid saer 1976.
Bron: Persberich Sjtadskapel ’t Trumke en ’t Tröötje
Foto’s: Sjtadskapel ’t Trumke en ’t Tröötje / RBZitterd
