Sjpektakel op ‘t Finale Sjpektakel

2018

Tradisjoneel sjloete De Marotte Zitterd de reeks zittinge aaf op de zaoterdig veur de kénjeroptoch. Tiejes dit ‘Finale Sjpektakel’ op zaoterdig 3 Fibberwarie e.k. traë vanaaf 20.00oer ein keur aan muzikaal artiste, bands en bekende Limburgse buuttereedners op, op de buun van de Zittesje Sjouwburg.

De Marotte Zitterd is ouch dit jaer weier gesjlaag om ein zeer gevareiert en hoogstaon pregram op de buun te brénge. Muzikante oet Zitterd wissele aaf mit artiste oet Limburg en dao boete. Basissjool Euverhaove bréngk ’t Marotte Kènjerleidje ‘Konfetti’, womit zie in de fianle van ’t Kinger Vastelaovesleedjes Festival (KVL) sjtonge. Sterre Cuypers, finaliste op ’t Tiener Vastelaovesleedjes Konkour (TVK), verzörg ein optraë mit ’t Marotte Tienerleidje ‘Veet gaon d’r veur’. Naeve dees jong talente sjtaon ervare artiste es Kartoesj (finalis LVK), Gein Haor Baeter en Trio Ongeplök op ’t pregram van dees zitting.

Ouch sjtaon twee dansacts op ’t pregram, mér waal twee totaal versjéllende. De Zittesje Prinsegard zal op komische en ludieke wies de gardedans brenge, terwiel Tanzcorps original Kölsche Domputzer garant sjteit veur ’t baetere gooi- en klömwerk oppe buun van de Sjouwburg. Bezunjer in ’t pregram is ’t optraë van de Desperado’s, de band van Sjtadsprins León I de drummer is. Wiejer sjteit d’r ein optraë op ’t pregram van Echt Lekker en ein buut van viefvoudig Limburgs Buuttekampioen Pierre van Helden. De muzikaal omliesting is in de vertroewde henj van De Marotte kapel.

Kaarte veur ’t Finale Sjpektakel zeen te koup in de Marottewinkel.