Sfeervolle äöpening van ’t Vastelaovessezoen

2019 Foto

Gisteraovend op de 11de van de 11de vonj op ’t Kloosterplien de äöpening van ’t Vastelaovessezoen 2018-2019 plaatsj. Ondanks ’t get raegenechtig waer waar d’r ein grote opkoms, neit zo massaal wie in Mesjtreich mér de sfeer zout waal al gout drin.

Naeve De Marotte mit Sjtadsprins León I ware ouch versjèllende Zittesje vereiniginge es De Senaat van De Marotte, Auw Prinse, Optochkommitee, Dörpelmaeg en Klup Wovan aanwezig. Oet ‘Groot Zitterd’ ware CV de Narre Euverhaove, De Mechelkes oet Broukzittert, De Klumpkes en CV de Kempernaaze Vrangendael-Kempekoel mit hunne Prins(es) en Jeug Prins(es) prezent bie de äöpening.

De Marotte Prizzenteierde deze aovend de nuuj Marotte CD ‘1 2 3 Vastelaovend’. Naeve de top 6 Van ’t Zittesj leidjeskonkour mit de sjlaager ‘1 2 3 Vastelaovend’ gezonge door ’t duo Sjtöm Toeval woorte ouch ’t nuuje Marotte Kenjerleidje gezonge door kenjer van OBS de Sjtadssjool en ’t nuuj Marotte Tienerleidje gezonge door ‘Veier G’ geprizzenteiert. Naeve de Zittesje zengesj en kapel TisNiksenTwurtNiks waere d’r optraës van Spik & Span en van Big Benny die de sjtömming d’r goud in wiste te brénge.

’t Sezoen woort offesjeel geäöpend door de Marottekapel die vanaaf ein balkon in ’t Kloosterkwartier de ‘t ‘Hoog ’t Rood Gael Gruin’ sjpeelde wonao door alle aanwezige Prinse gezamelik de klok woort onthuld die geit aaftelle pés Vastelaoveszaoterdig 2 Meert 23.11oere. De Mander haw ’t Maske wier opgegrave dat op vastelaovesdaensdig is begrave. Dit Maske hingk noe weier pés Vastelaovesdaensdig aan ’t balkon van kafee de Kroon oppe Mert.

Klup Kump Gout prizzenteierde veur ’t zösde jaor op riej De Greutsje Pin, mit ’t koupe van dit sjpèngske sjeunt men de deilnummende Zittesje vereiniginge. De Greutsje Pin 2019 woort onthuld door Sjtadsprins León I, dae oet henj van Ruud Meuwissen van Klup Kump Goud ’t eesje exemplaar van De Greutsje Pin kreeg oetgereik.

Foto’s: VastelaovendZitterd-RBZitterd