Mit nog ruum 3 waeke pés de Vastelaovend haet Sjtadskapel ’t Trumke en ’t Tröötje ’t pregram bekend gemaak veur de 15e edisie van ’t kanon van ’t Balkon op Vastelaoveszaoterdig 10 Fibberwarie.
’t Kanon van ’t Balkon sjtart om 18.11oer mit ein sjpetterend pregram mit ruum 80 artieste!
Optraë zullen in willekeurige volgorde Beppie kraft, Erwin, Big Benny, Kartoesj, Katja, Ronald & Carien, Henk Hover en Don Kiesjot. Veur muzikaal klanke zörg de Marotte kapel, Limburg Kampioen Zaatehermeniekes Joekskapel Kiek Me roet Zjwame en de Zittesje kapel Trööt in de Gööt. Wiejer op ’t pregram volges vas resép de Marotte sjlaagesj aansjtormend talent en artiste oet Zitterd en omgaeving.
Om 23.11 zal börgemeister Sjraar Cox van Zitterd-Gelaen de sjleutel van de sjtad euverdrage aan de Sjtadsprins León I.
Veuraafgaond aan ‘t ‘grote’ Kanon van ’t Balkon is vanaaf 16.33oer ’t Kenjer Kanon van ’t Balkon mit optraës van Zittesje Basissjole, jeugdige zangk en danceacts, de Zittesje kénjerkapel, Marotte kenjerleidje, Marotte tienerleidje en de top 3 van ’t Tiener Vastelaovesleidjes Konkour (TVK).
Bron: Kanon van ’t Balkon
Foto: Ton Dirkx
