Tradisjoneel wurt op daensdignach ‘t Maske begrave es teike dat de Vastelaovend veurbie is. De Carnavaleske aafsjied van de Vastelaovend wurt georganezeiert door de Klup Neit Kapot te Kriege same mit Culturele vereiniging de Mander die ooit dit inisjatief haet genomme. Al in de jaore dertig van de veurige eeuw begrouf De Mander ’t Maske en höbbe zie dees tradiese in 1974 opnuuj opgepak. Noe make KNKTK en De Mander same ’t sjloetsjtök van de Zittesje Vastelaoves 6-daagse die kolderiek en hartversjeurend tegeliek is.
Door de aafnummende belangsjtelling veur ’t Maske begrave is besjlaote ’t Maske Begrtave dit jaor eine nuuje opzat te gaeve. Zo zal ’t Maske neit mee in de kogelvenger op de Kolleberg waere begrave, mèr op ’t Kloosterplien. Ouch zal dit vruiger op de aovend gaon plaatsj venje.
De sirremonie begint om 18.11oer es door Sjtadsprins León I ’t Maske wurt aafgehaold dat op de 11de van de 11de door detoen regeierende Sjtadsprins Bart II is opgehange aan ’t balkon van Kafee De Kroon. Aansjloetend zal uch door Klup Neit Kapot te Kriege taege ein klein prieske ein sjtaond Vastelaovesdiner waere aangebaoje.
Om 21.11oer vertrek veur de Patesjkirk de fakkeltoch nao ’t Kloosterplien, wo om 21.33oer op ein nuuj menneier ’t Maske zal waere begrave. Nao aafloup is bie Tapperie De Gats ein Kaffetaofel.
