De jaororde van De Marotte ként ein lange tradiese. De orde is bedoeld es ein erkenning veur ’t werk van de väöle vriewilligesj en mitwirkesj bénne de grote ‘Marotteperpluu’. Ein ongersjeijing die men neit zo mér krig. Men mot dao get veur doon in ’t belang van De Marotte en de Zittsje Vastelaovend. De jaororde is ouch dit jaor weier ontworpe door Luc Bormans, zien veierde ontwerp op riej.
De eesjte jaororde van Sjtadscarnavalsvereiniging De Marotte Zitterd wurt tradisjoneel door de Sjtadsprins van De Marotte op de nuujjaorsresepse van Daeke monseigneur van Rens oetgereik aan de daeke en aan ’t college van börgemeister en wethawesj van de Gemeinte Zitterd-Gelaen.
Zitterd 775 jaor sjtad
De jaororde van dit jaor sjteit in ’t teike van Zitterd 775jaor sjtad. Rondj 1200 beheurde Zitterd pés ’t Auw Hertogdom Limburg en in 1243 kreeg Zitterd daobénne Sjtadsrechte, verleend door graaf Walram van Limburg en zien mooder Elisabeth. Vanaaf dat moment haw Zitterd ’t rech zich te besjirme mit sjtadswalle. Veural ‘t 750 jaorig sjtadsjubbelie van Zitterd in 1993 is groots gevierd. Anno 2018, 25 jaor later, wurt waal sjtilgestange bie 775jaor sjtad, mér niet zo oetbundig es in 1993.
Ontwerp
Ontwerper Luc Bormans haet zich laote inspireiere door dees sjtadsverlening in 1243. In zien ontwerp haet hae ein verbénjing gemaak tösje vruiger en noe. Dat haet hae gevisualiseiert door via Ligne nao de Grote Kirk te kieke. Op de ongergrondj van de orde sjteit de teks van ’t leidje ‘Zo waar ’t vruiger en zo is ’t noe’. De kleure in de loch zeen ein carnavaleske vertaling van de verlichting op ’t bénneplein van Ligne, ’t nuuj sjtök van de Zittesje bénnesjtad. De loch is gries-blauw gehawte.
Op de jaororde wiejer eine persoon dae op ein trööt blees, went meziek verbindj door de eeuwen haer, op eeder fees en bie eedere sjtömming en fees. Rechs baove sjteit ’t jaortal 2018 en de naam Marotte Zitterd. Links de Vastelaoveskleure rood, gael en gruin. Rechs onger sjteit ’t getal 775 in ein sjtrakke eigentiedse vormgaeving.
De jaororde ouch dit jaor weier ein kleinood om greutsj te drage en te beware!
Bron: De Marotte Zitterd
Foto: Arjan Krijntjes
