Marotte CD 1-2-3 Vastelaovend

De tittelsong en sjlaager 2019 ‘1,2, 3 Vastelaovend’ wurt gezonge door Sjtóm Toeval

Bie de äöpening van ’t Vastelaovessezoen op de 11de van de 11de is door Sjtadsvastelaovesvereiniging De Marotte Zitterd de nuuj CD, mit es tittel ‘1-2-3 Vastelaovend’ geprizzenteiert. Dees CD is ‘t dertigste zilvere sjiefke mit de Marotte sjlaagesj. ’t Ontwerp van de hoes van de CD is wederom oet de handj van Marc Webers van Studio MarQ. De produksie en opnames ware ouch dit jaor weier in henj van Studio Theelen in Munstergelaen.

De CD hoes is ein ontwerp van Marc Webers

Op de CD sjteit wie gebroekelik de Zittesje Vastelaovessjlaager, de tittelsong van dit jaor ‘1, 2, 3 Vastelaovend’ wurt gezonge door Sjtóm Toeval (Thierry Dirkx en Maxime Tummers). De sjlaager is gesjreve door Thei Wessels, dae al meerdere maol ’t Zittesj Vastelaovesleidjes Konkour wis te wènne. Wiejer sjtaon op de CD de nömmesj twee pès zös van ’t ZVK. Achtereinvolges nr.2: ‘’t Is eine jóng van ós’, gesjreve door Chrissy Steinen, Guus Steinen en Jan van Daal, gezonge door Koeraasj, nr.3: ‘’t Aller aller aller’ van Theo Weijman en Mark Willems, gezonge door Lisa en Max Schiffler, nr.4: ‘Zolang mien vuit mich kènne drage’ mit teks en meziek van Sjohn Smeets en Gian Prince, gezonge door Oet Balans (Andrea Poddighe en Jos Meesen), nr.5: ‘Mit de meziek mit’ gezonge en gesjreve door Gein Haor Baeter (Ed Geilen en Petro Willems) en de nr.6 ‘Mit de Vastelaovend’, gesjreve door Phil Schaeken mit zangk van Fieny Cals.

Tradisjoneel sjteit op de Marotte CD ouch ein kènjerleidje. Dit jaor haet ’t kènjerleidje es tittel ‘Tisneitniks’ en wurt gezonge door kènjer van OBS de Sjtadssjool. De teks en meziek zeen van Thei Wessels. De Sjtadssjool besjteit in 2019 tweehonderd jaor en lègk mit dit leidje de link tössje sjool en Vastelaovend. Veurig jaor won de Sjtadssjool ’t KVL mit ’t leidje ‘Eine Top Vastelaovend’.

’t Letste leidje op de CD is ’t Marotte Tienerleidje ‘Doe Dao!’, dat wurt gezonge door Veier-G. Veier-G sjteit veur Veier Gezèllige mechelkes: Jada, Jazzamin, Jolie en Myrthe. ’t Tienerleidje is gesjreve door Myrthe Verblakt en Marc Verblakt. Mit dit leidje sjteit Veier-G in de finale van ’t Tiener Vastelaovesleidjes Konkour 2019.

De CD is veur €12,95 te koup in de Marottewinkel (vanaaf 15 December) of bie de volgende verkouppunte: Kafee De Kup, Kafee ’t Sjterfhoes, Wollstreet, Primera, Fotografie Ton Dirkx en Van Neer Eyckeler Mode. Onlain is de CD te koup via de webshop van De Marotte veur €14,50 (www.shop.marotte.nl).

De CD is dit jaor ouch besjikbaar via online streamingsdeinste es iTunes en Spotify. Naeve de CD van dit jaor zeen ouch versjèllende auw Marotte CD’s te beloestere via streaming.

Bron: De Marotte Zitterd
CD Hoes: Ontwerp Marc Webers, studio MarQ