León Kaminski van Prins pés Keizer

Gistermiddig vonj bie sjtraolend zonnig waer ’t Alternatief Sjöttefees plaatsj, de opkoms van ’t pebliek op ’t feesterrein en bie de optoch waar dan ouch groot. Cour Solanus in de bènnesjtad waar omgeduip pès feeslokase veur de 4x11de edisie van dit ludieke sjöttefees. Rondj de middig verzamelde 16 vereiniginge zich mit dao biej 2 vereiniginge (de Rempetempers en Auw Prinse Kempernaaze) veur wae ’t de eesjte deilname aan ‘t Alternatief Sjöttefees waar.

Nao de ludieke prizzentases van de vereiniginge aan de zjurie en aan Keizer Marc Kessels van de Auw Prinse en zien Keizerin Katja trok de optoch door de bénnesjtad. Nao aafloup van de Optoch waar ’t aan de vereiniginge om bie ’t Keuningssjeite ongerling te sjtrieje om de Keuningtittel bénne hun vereiniging.

Nao ’t keuningssjeite waar ’t tied veur ’t Keizesjsjeite. Nao eine sjpannende sjtried tössje de 16 keuninge waar ’t León Kaminski van kapel Aafsjlaag Zitterd dae ’t letste sjtökske van de tempex vogel wis aaf te sjteite en zich zo kroonde pés Keizer van ’t Alternatief Sjöttefees 2018. León Kaminski is de regeierende Sjtadsprins van Zitterd, naeve Sjtadsprins is noe dus ouch keuning en Keizer!

Volges tradiese organeziert de vereiniging die de keizer in hun midde höbbe, dit jaor dus kapel Aafsjlaag Zitterd, volgendjaor ’t Keizesjfees op de zaoterdig veuraafgaond aan ’t Alternatief Sjöttefees.


Video: De Optoch van ‘t Alternatief Sjöttefees 2018

Foto boven: Sittard-Geleen.nieuws.nl
Video: VastelaovendZitterd-RBZitterd
Fotoalbum: VastelaovendZitterd-RBZitterd