Zaoterdig 10 Fibberwarie is veur de 15de keer ’t Kanon van ’t Balkon. Ein van de vernuujinge dit jaor is dat d’r ein laif oetzending geit plaatsj vènje, die onger anger via de websait www.zitterdsame.nl en www.webcamsittard.nl veur jeederein te volge is. De beelde vanaaf de mert zeen taeves te zeen in versjèllende Zittesje kafees. Daonaeve vèngk ein oetzending plaatsj bie Zuyderland Zitterd-Gelaen en waere nog anger insjtèllinge in de omgaeving gezoch wo de oetzending, kosteloos, via ein direkte verbènjing kent plaatsj vènje.
Door ein samewirking mit vriewilligesj vanoet versjèllende organezasies haet de vriewilligesjorganezase ‘Zitterd Same’ op inovatieve wies invulling weite te gaeve aan de oetdaging van Sjtadskapel ’t Trumke en ’t Tröötje. Mit direkte ongersjteuning van Arkasis B.V. is mit ein gans nuuj toepassing van besjtaonde techniek de muigelikheid veur dees laif oetzending gecreeierd.
De oetzending sjtart om 16.33oer mit ’t Kènjerkanon, wonao zie direk aansjloetend rondj 18.00oer euver zulle gaon nao ’t Kanon van ’t Balkon. Om 23.11oer kènt jeederein laif getuug zeen van de sjleuteleuverdrach door Börgemeister Sjraar Cox aan Sjtadsprins León I.
Achter de sjerme zeen vriewilligesj al versjèllende maonje bezig mit de veurbereidinge en ’t vènje van technische oplossingen veur de oetzending. De laif oetzending van ’t Kanon van ’t Balkon wurt gans gerealiseerd door vriewilligesj. De oetzending is te volge op www.zitterdsame.nl of www.webcamsittard.nl. Veur ein direkte verbènjing kènne insjtèllinge en bedrieve veur mee infermase kontak opnumme mit Ton Smeets van ‘Zitterd Same’ via emeel: t.smeets@zitterdsame.nl
Bron: Zitterd Same
Foto: Ton Dirkx
