Insjtelasezitting Sjtadsprins León I

Zaoterdig 20 Jannewarie e.k. is om 20.00 oer in de grootezaal van de Sjtadssjouwburg ‘De Domijnen’ de insjtelasezitting van Sjtadsprins León I. De zaal is vanaaf 19.33 oer geäöpend. De muzikaal omliesting is in henj van de Marottekapel.

De insjtelasezitting van De Marotte is ein zitting die in ‘t teike sjteit van komme en gaon, mer dan in omgedreejde volgorde.  ‘t Gedeilte veur de pauze sjteit in ’t teike van ’t aafsjeid van regeierend Sjtadsprins Bart II. Es eesjte véngk ‘t ‘plökke’ plaatsj en mot hae volges protocol achtereinvolgend de scepter, de vaere, de prinsemutsj, de ketting mit de nonnevot en ’t verke en de ketting mit ’t sjlaateveugelke en ‘t pappegeyke inlevere. Nao ‘t plökke zal de dan ex prins Bart Offermans zien dankwoord oetsjpraeke en trök kieke op zien Prinssjap. Bart ként trök kieke op ein sjoon regeierjaor, ein sezoen vol ‘Gekke Teun’, Sint Joep ‘De Paek’ en de Phil, vlogs en ‘aansjlaon’.

Aansjloetend brenge de Auwt Prinse hun tradisjonele Grosse nómmer. Wie zie op de regeierperiode van Bart trök kieke zal blieke in de Grosse Nómmer. Waat en wae de auwt prinse in hun Grosse nómmer onger de loep numme is wie gebroekelik nog geheim, mer zal zeker weier bol sjtaon van de neudige kolder en hilariteit.

Proklemase
Nao de pauze sjteit León Kaminski (27) centraal. Mit ein kolderieke ekt wurt Léon op de buun gebrach door femieje, vrunj, buurt en vereiniginge. In dees ekt väöl illemènte die verwieze nao de nuuje Sjtadsprins en akteweel zake. León is es lid van de Philhermenie de opvolger van twee sjtadsprinse die lid ware van Hermenie Sint Joep. León wirkzaam bie Koenen & Co in Mesjtreich en sjtudeierend aan Nyenrode University veur registeraccountant, sjport twee keer in de waek en hilt van oergaon mit vrunj. Kortom ingrediënte genog om weier ein leuke act van te make.

Aansjloetend aan ’t opbrènge zal León door Vors Marot Frits offisjeel geinsjtelleiert waere pès Sjtadsprins León I. Nao ‘de aed op ut Marotte vaenke’ krig hae de bie zien Prinssjap beheurende teikes oetgereik, woonao hae offisjeel es Sjtadsprins León I euver ‘t Zittesj Marotteriek zal regeiere. Nao ‘t veurlaeze van zien Proklamase zal hae veur de eesjte keer zien Prinse motto ten geheure brenge. Aan ’t enj van de zitting trakteiert Sjtadsprins Léon I mit de tradisjonele nonnevotteraege alle aanwezige op ein richtig Zittesje nonnevot.
Nao aafloup van de zitting is in de Charles Eyck zaal van de sjouwburg ‘t Prinsebal mit meziek van DJ Wouter.

Losse Kaarte veur de insjtallasezitting zeen te koup in de Marottewinkel op de Brandsjtraot bie Van Neer-Eijkeler (donderdig 10-14oer en zaoterdig 10-17oer) en bie de Oetbalie van de Sjouwburg.