Sjtadsvastelaovesvereiniging De Marotte Zitterd organezeiert op Gounsdig 31 Jannewarie de jaorlikse kénjerzitting. Deze middig mit dans, zénge en sjprénge veur de jongste Mechelkes en Sjnaake véngk plaatsj in Poppodium Volt aan de Odasingel. ’t Pregram begint om 14.33oer, vanaaf 14.00oer zeen de deure van Poppodium Volt geäöpent.
De Marotte roupe alle kénjer en hun awwesj op om verkleid na de kénjerzitting te komme. Veur de sjoonst verkleide kénjer haet Sjtadsprins León ein verrassing in petto. Jeeder kéndj krig van de organezase get lekkesj en ein glaeske ranja.
Optraës deze middig zeen d’r van Fabrizio en de Zittesje finaliste van Kinger Vastelaovesleedjes Konkour (KVL). Kénjer van OBS de Sjtadssjool brénge ’t leidje ‘Eine Top Vastelaovend’ womit zie aafgeloupe zondig ’t KVL höbbe gewonne. Kénjer van Basissjool Euverhaove zénge ’t Marotte kénjerleidje ‘Konfetti’. De kénjerzitting wurt muzikaal opgeloestert door de meis jeugde kapel van Zitterd, de Zittesje kénjerkapel. Naeve meziek zeen d’r ouch versjéllende sjpelkes veur de jongste jeug en zal clown Pipo Pé de kénjer ammezeiere.
Kaarte veur de kénjerzitting zeen veur €3,50 te koup in de Marottewinkel (Van Neer Eyckeler, Brandsjtraot) en gounsdigmiddig aan de kassa van Poppodium Volt. Zeet waal oppe tied, went veurigjaor waar de Kénjerzitting voledig oetverkoch.
Bron: De Marotte Zitterd
Foto: Arjan Krijntjes
