Ere Nonnevot van de Prinsegarde Zitterd veur Thei Wessels

2019

Jaorliks reik De Prinsegarde Zitterd 111daag veur de Vastelaovend Nonnevotte oet aan ein aantal persone. Mit ’t oetreike van dees Nonnevotte wilt De Prinsegarde hun bedanke en alvas wakkersjödde dat de Vastelaovend euver 111daag in aantoch is. Dit jaor is ’t toevallig 111daag pés de Vastelaovend, eine daag naodat ’t Vastelaovessezoen is geäöpent.

Ein extra grote versie van de Nonnevot geit jaorliks nao de regeierende Sjtadsprins en börgemeister van Zitterd-Gelaen Sjraar Cox. Daonaeve kriege ein aantal persone ein Nonnevot oetgereik om hun te bedanke veur hunne inzat veur de Zittesje Vastelaovend. Zo ginge dit jaor Nonnevotte nao de Bielemen (Sjra Derrez, Leon Tonglet, Luc Laudy en Stan Perreé), Groot Vors van De Marotte Zitterd Fernao Schmeits en Lejao Beursgens.

Naeve dees Nonnevotte krig jaorliks eine persoon ein sjpisjaal Nonnevot, de Ere Nonnevot. Dees extra grote Nonnevot geit nao eine persoon dae zich in ’t aafgeloupe jaor(e) sjpisjaal haet ingezat veur de Zittesje Vastelaovend. Dees jaor veil dees eer te beurt aan Thei Wessels.

Thei Wessels is eine richtige Sjteivigers sjnaak, hae ontving de Ere Nonnevot omdat hae bienao ’t ganse jaor door bezig is mit Vastelaovend. Veural op muzikaal gebied is Thei heel actief. Hae sjreef al väöle Zittesje Vastelaovesleidjes en won al neuge maol ’t Zittesje Vastelaovesleidjes Konkour wo onger de  sjlaager van dit jaor ‘1 2 3 Vastelaovend’. Ouch haet Thei al versjèllende leidjes gesjreve veur Zittesje sjole veur deilname aan ’t KVL, wo onger ’t leidjes wo OBS de Sjadssjool aafgeloupe jaor ’t KVL mit haet gewonne. Daonaeve sjreif Thei ouch leidjes veur artiste van boete Zitterd die aan ’t LVK wille mitdoon en haet hae leidjes gesjreve veur de Zittesje revuu. Wiejer is Thei eine actief waageboewer bie de waageboewesj Buurt Sjteivig wo hae ouch jaorelangk veurzitter van is gewaes. Veur de Prinsegarde Zitterd rae om Thei Wessels dit jaor te waardeiere mit de Ere Nonnevot.

Eerder ontvinge ongermee Fred den Rooijen, Thijs Jacobs, Pierre Dieteren, Harrie Vanderbroeck, Joep Wijnands, Peet van Erp en Sjohn Smeers de Ere Nonnevot van De Prinsegarde Zitterd.

Bron en Foto: Sittard-Geleen.nieuws.nl