De ‘Pappegey’ vlug veur de 137e keer oet

2018

‘Veer zeen Zitterd’ is dit Vastelaovessezoen ’t jaormotto van Sjtadsvastelaovesvereiniging De Marotte Zitterd. Ouch ’t kolderieke jaorblaad De Pappegey is dit jaor weier gevuld mit komische artikele, gekke gebeurtenisse en kleurrieke anekdotes, wobie Zitterd, häör inwonesj en de Sjoone Zittesje Vastelaovend centraal sjtaon. Naeve de paiere verzie is d’r ouch ein gesjpraoke verzie van De Pappegey, dae bedoelt is veur blinje, slechzeende en luuj die muijte höbbe mit ’t laeze van (dialek) tekste.

Tradisjoneel versjient op vriedig/zaoterdig veur de Kènjeroptoch de nuuj edisie van ‘De Pappegey’, dae dit jaor veur de 137e maol wurt oetgebrach. Al versjéllende jaore wurt de Pappegey oetgebrach es ein kwalitatief glossy magazine, dat naeve humor en ‘sjaele kal’ ouch serieuze achtergrondj artikele bevat euver onger angere Sjtadsprins León I.

De redaksie maak volges gebroek de inhoud neit bekent, mér geef waal aan dat de laezer van De Pappegey weier dénger te weite kump euver de nuuje Sjtadsprins. Ouch is d’r ein trökblik op ’t aafgeloupe Vastelaovessezoen wo in ex-Sjtadsprins Bart II veurop ging in de Zittesje Vastelaovend en wiejer in De Pappegey zo es  ’t bekende gezegde zaet ‘nog mee en nog mee en nog väöl mee…’!

’t Eesjte exemplaar van de Pappegey wurt in besjlaote krengk aangedao aan Sjtadsprins León I. Vanaaf 3 Fibberwarie is ’t jaorblaad veur jeederein besjikbaarbaar. ’t Ludieke blaad is, dankzij de väöle sjponsore ouch dit jaor weier GRATIS verkriegbaar.

De Pappegey is verkriegbaar op de volgende plaatsje:
– Marottewinkel (damesmode Van Neer Eyckeler, Brandjsjtraot)
– Boukhanjer Krings (Brandjsjtraot)
– Sigaremagazien Augustus van Neer (houk Mert – Lömmerichersjtraot)
– Bruna Sittard (Gruuzesjtraot)
– Hendriks Carnaval (Riekswaeg Noord)
– ’t kallebeske (Sjteivig)
– AS Lunchies (Walsjtraot)
– VVV Sittard (Rosmeulesjtraot)
– Eveline Mode (Dempseysjtraot Lömmericherveldj)
– Gijsen Optiek (Tempelplien)
– Shell Dr. Nolenslaan (Dr. Nolenslaan
– Shell Leyebrouk (Leyebroukerwaeg)
– Jumbo Sittard (Romeinenstraat)
– Albert Heijn (Bröksjtraot)
– Honings Roubrouks (Heisjtraot)
– PLUS Boudy Postma (De Samaritaan)
– Fotografie Ton Dirkx (Paesjsjtraot)

Bron: De Marotte Zitterd
Foto: Arjan Krijntjes