Äöpening van ‘t Vastelaovessezoen op de 11de van de 11de

2019

De Marotte Zitterd äöpene op de 11de van de 11de ’t Vastelovessezoen 2018-2019. De äöpening van ’t Vastelaovessezoen vengk plaatsj op Kloosterplien in Zitterd, in samewirking mit hermenie Sint Joep wurt gezörg veur ein drenkske. ’t Kloosterplien zal waere verlich en in Vastelaovessfeer aangekleid pes ein sfeervol Vastelaovesplein.
Bie de äöpening van ’t sezoen zulle naeve De Marotte mit Sjtadsprins León I en de Marotte Perpluu vereiniginge ouch Vastelaovesvereiniginge van ‘Groot Zitterd’ mit hun Prinse prezent zeen.

Naeve väöl meziek sjtaon op ’t pregram ein aantal offisjeel momente. Zo zal Klup Kump Gout De Greutsje Pin 2019 prizzenteiere en wurt ’t Vastelaovessezoen offesjeel geäöpend door De Marotte same mit De Mander.

Om 18.30 oer sjtart ’t pregram mit es aaftrap de kapel TisNiksenTwurtNiks die hun klanke alvas zal zörge veur de richtige sjtömming. De Marotte prizzenteiere de nuuj Marotte CD, die allein deze aovend te koup is veur de sjpisjale pries van €11,-. Van de nuuj CD wurt de top 6 van ’t Zittesj Vastelaovesleidjes konkour gezonge mit natuurlik de Zittesje Vastelaovessjlaager ‘1 2 3 Vastelaovend’, gezonge door ’t duo Sjtòm Toeval. Kenjer van de jubbeleierende OBS de Sjtadssjool zénge ’t nuuj Kènjerleidje ‘Tisneitniks’ en Veier-G brèngk ’t nuuj Marotte Tienerleidje Doe dao!’. Wiejer zeen d’r optraës van Big Benny en de 3-voudig LVK-wènnesj Spik & Span en nog mee en nog mee en nog väöl mee.

Bewus höbbe De Marotte gekaoze om de äöpening van ’t Vastelaovessezoen vruig op de aovend te hawte, zodat is muigelik is om mit de ganse femieje nao de äöpening van ’t sezoen te komme. De entree is gratis!
Enigszins verkleid komme zörg veur eine richtige Vastelaovessfeer, mer is natuurlik neit verplich.

Nao de äöpening van ’t Vastelaovessezoen op ’t Kloosterplien geit ’t fees wiejer in de Zittesje kafees. In de kaffees zörge de kasteleins veur toepasselikke meziek en optraës om al in de richtige Vastelaovessjtömmig te komme.

Bron: De Marotte Zitterd
Foto: VastelaovendZitterd-RBZitterd