Aankommende zondig, 2 September, véngk weier ‘t Alternatief Sjöttefees plaatsj. ’t Feesterrein is op Cour Solanus aan ’t Kirkepaad (vanaaf de Mert langs de Patesjkirk).
Alle deilnummende Alternatieve Sjötterieje, die veural besjaon oet Zittesje (Vastelaoves) vereiniginge en Zittesje kapelle verzamele zich vanaaf 12.30 oer op ‘t feesterrein en prizzenteiere zich vervolges bie ’t defile op ein ludieke maneier aan de zjurie en Keizer Marc Kessels van de Auw Prinse Zitterd. Nao ‘t Defile trekke rondj 14.00 oer alle deilnummende alternatieve sjötterieje in de optoch door de bennesjtad.
Aansjloetend aan de optoch beginne op ’t feesterrein de sjeitwedsjrieje. Dit geit neit wie bie ein echte sjötterie op bölkes of eine houte vogel, mer op ’t Alternatief sjöttefees gebeurt dit door mit ein wendjbuks op eine tempexvogel te sjeite. ’t Sjteite is ein sjport apaart, wo ouch ’t neudige gelök bie kump kieke. Daegeine dae ’t letste sjtökske van de vogel aafsjöte maag zich keuning nuime. In de eesjte sjeitronje wurt door alle alternatieve sjötterieje ongerling gesjaote om de Keuningstitel bènne hun ‘sjötterie’. Aansjloetend sjeite in de tweede sjeitronje alle keuninge taegen-ein om de Keizerstitel. De keuning dae dan de voogel aafsjöt maag zich ein jaor langk Alternatieve SjötteKeizer van Zitterd nuime. De alternatieve sjötterie woo de Keizer lid van is haet de eer om volgendjaor ‘t Keizersfees op de zaoterdigavond veuraafgaond aan ’t Alternatief Sjöttefees te organizeiere.
Keizesjfees
Op de zaoterdigaovend veuraafgoand aan ’t Alternatief Sjöttefees is tradisjoneeel ’t Keizesjfees. Dit jaor wurt ’t Keizesjfees georganezeiert door De Auw Prinse Zitterd ter eere van hunne Keizer Marc Kessels (Sjtadsprins Marc I, 1996) en zien Keizerin.
Zo wie gebroekelik haet ’t Keizesjfees en thema, dit jaor is dat ‘Kènjerfeeske’. De Auw Prinse höbbe veur dit thema gekaoze de auwste dochter van Keizer Marc en Kezierin Katja op deze daag jaorig is. Zo wie op ein richtig Kènjerfeeske zeen d’r sjpelkes mit leuke prieze, Koukhappe, Aezelke Prik, Sjminke en ein Verkleidkis. Meziek is d’r van DJ Sepp en Loose en ein verrassjend verrassjings atrae. D’r is sjlök, ranja en ein fritkraom, natuurlik wurt ouch beier en wien gesjonke.
‘t Keizesjfees is op zaoterdig 1 September e.k. vanaaf 20.00oere in ’t Feespaviljoen op Cour Solanus.’t Keizesjfees is veur jeederein, dus ouch neit deilnómmesj aan ’t Alternatief Sjöttefees, Gratis toegankelik.
Mee infermase euver ’t Alternatief Sjöttefees en ein prizzentase van de deilnummende vereiniginge is te venje op de Faceboukpagina van ’t Alternatief Sjöttefees Zitterd.
Bron: Alternatief Sjöttefees Zitterd
Foto: Sittard-Geleen.nieuws.nl
