Jeederein dae wilt mittrekke in de Groote Optoch mot zich veur deilname aanmelje bie ’t Optochkommitee. ‘t Digitaal insjriefsysteem dat ’t Optochkommitee veurigjaor haet geintroduseiert is noe weier geäöpent. Via dit systeem is ’t muigelik om in drie sjtappe uch aan te melje veur deilname aan de grote optoch en kénjeroptoch. Aanmelje veur deilname kent op de websait van ’t Optoch Kommitee via http://optoch.nl/aanmelden
Veur ’t eesjte gebroek dient men zich in te sjreive es kontakpersoon, vervolges is ’t muigelik om ein of meerdere deilnummesj aan te melje. Dit aanmelje geit in drie sjtappe: 1. Gegaeves invulle, 2. Idee en omsjrieving, 3. Bevestige en verzende. Vervolges krig geer ein reaksie per mail, zodat geer zeker zeet dat de aanmeljing is ontvange. Daonao volg ein reaksie van de Optochsamesjteller of ’t idee is goudgekeurd of dat nog mee toelichting neudig is.
Natuurlik kent geer de Optochsamesjteller Roy Moerskofski ouch geweun mailen via aanmelden@optoch.nl, of belle es geer vraoge höb, mer ’t digitaal insjreive haet väöl veurdeile.
Wiejer verangert niks wat betref deilname aan de optochte. Aanmelje veur deilname aan de groote optoch is verplich, Zonger aanmeljing kent geer neit deilnumme! Op vriedigaovend veur de Groote Optoch is wie gebroekelik ’t nömmeraafhaole bie kaffe Schtad Zitterd.
Ouch veur deilname aan de Kénjeroptoch is ’t muigelik om uch via ’t aanmeldsysteem in te sjrieve, mer aanmelje is NEIT verplich.
Veur vraoge kent geer altied meele (aanmelden@optoch.nl) of belle mit Roy Moerskofski van ’t Optoch Kommitee.
Nog ein tip: Wach neit tot de letste daag om eur idee door te gaeve. Geer löp dan ein risiko! Aafgeloupe jaor (Groote optoch 2017) zeen in de letste daag 8 insjreivinge geweigerd, omdat hetzelfde thema (De Sjpaspas) al meerdere kere veurkwaam in de Optoch en per kattegrie ’t maximum waar bereik. Wach dus neit te lang om zeker te zeen van deilname!
Update 30 jannewarie 2018:
‘t Optoch Kommitee haet bekend gemaak dat versjéllende thema’s al zeen gesjlaote door ‘t bereike van ‘t maximum aantal kere in de Optoch.
Veur de volgende thema’s ként neit mee waere ingesjreve: Veer zeen Zitterd, Sjloeting zjwömbade in de gemeinte Zitterd-Gelaen, Optochzjurie en MeToo
Bron: Optoch Kommitee Zitterd
Foto: RBZitterd / VastelaovendZitterd
