Vastelaovessjlaager 2018 ‘VEER ZEEN ZITTERD’

2018 Meziek

In ein vol en sfeervol Poppodium Volt is gisteraovend de Zittesje Vastelaovessjlaager veur Vastelaovessezoen 2017-2018 gekaoze. Alle ellef de leidjes die in de finale sjtonge woorte laif gezonge door Zittesje zengesj, wobie de meziek dit jaor al eerder waar opgenomme. De zjurie onger leiding van Notaris Tim Gielens besjtong oet ein vak- /prominentezjurie mit Paul Kalkhoven (meziekdocent en lid van versjellende meziekvereiniginge), ’t duo Spik & Span (2-vouding LVK wennesj) en Henk Hover (L1) en alle aanwezige die op ‘t sjtömbiljet hunne top 3 invulde.

Nao ’t telle van de sjtömme kwaam es winnaer nao veure ‘Veer zeen Zitterd’ gesjreve door Ed Geilen en Petro Willems. De nuuje sjlaager wurt gezonge door Ed en Petro es duo Gein haor Baeter. Oet henj van Marianne Hunnekens-de Kok en Sjtadsprins Bart II kreege Ed en Petro de Thei Hunnekens wisseltroffee oetgereik.

Ed en Petro doon saer 2010 es ’t duo Gein haor Baeter mit aan ’t Zittesj Leedjeskonkour en höbbe zie jeederjaor ein plaatsj in de finale van ’t ZVK weite te haole. Dit jaor is ’t hun nao de neudige 2de, 3de en 4de plaatsje eindelik gelök om ‘t ’t Zittesj Vastelaovesleidjes Konkour te wenne.

Alle wènnesj van ‘t Zittesj Vastelaovesleidjes Konkour 2018

Op de tweede plaatsj eindige ‘t leidje ‘Kabáw’ gesjreve door Thei Wessels en gezonge door Koeraasj (Jan, Ron & Maike). De driede plaatsj ging nao ‘Laef de Vastelaovend’ gesjreve en gezonge door Cyrille Niël, dae dit jaor veur de eesjte keer zellef ein leidje haet gesjreve.

Naeve de de top 3 komme ouch de nömmesj veier pes zös op de nuuje Marotte CD te sjtaon. Dat zeen ‘Mos doe niet eine gaeve’ gesjreve door Ger Muijers en gezonge door ’t duo Sjtom Toeval, ‘Blifs in mien hart’, ein ode aan Zitterd gesjreve door Sjohn Smeets en Gian Prince, gezonge door Bart en Lejao en tensjlotte ‘Waat is ein Trumke zonger Tröötje’ gesjreve door Guus Steinen mit zangk van Jack en Ron.

Naeve de wennende leidjes kump op de nuuje Marotte CD ein kènjer Vastelaovesleidje te sjtaon, dat dit jaor wurt gezonge door kenjer van Basissjool Euverhaove en ouch dit jaor weier ein Tiener Vastelaovesleidje.
De nuuje Marotte CD wurt bie de äöpening van ’t Vastelaovessezoen op de 11de van de 11de geprizzenteiert en is vanaaf eind November te koup in onger angere de Marottewinkel.

Video afspelen

Foto’s en video: RBZitterd – VastelaovendZitterd