Vastelaovesmaondig, 27 Fibberwarie, is tradisjoneel de daag van de Zittesje kapelle en zaate Hermeniekes. ’t Tröotekonkour krig dit jaor eine get angere opzat es anger jaore. Wo anger jaore allein ein podium midde op de mert sjtong, sjtaon dit jaor 3 kleinere podiums versjpreid door de Zittesje bènnesjtad. De kapelle spele op de Mert, bie de Sjtadspomp oppe Lömmerichersjtraot (bie kafee de Kup) en op ’t Kirkplien bie kafee ’t Sjterfhoes.
Om 14.44oer wurt ’t Tröötekonkour op de Mert geäöpent door de Marottekapel mit Sjtadsprins Bart II en de Marotte, gevolg door ein optraeje van Zittesj meis jeugdige kapel: De Kènjer kapel. Aansjloetend trèkke de kapelle rondj en laote zie vanaaf de podiums de Vastelaovesklanke klinke. Alle kapelle zulle sjpele op alle drie 3 podiums, wo zie minimaal 15 menuut sjpele. ’t Tröötekonkour wurt aafgesjlaote op de mert mit eine optraeje vol sjpektakel van kapel Trööt in de Gööt.
Sjtadsprins Bart II zal versjèllende prieze oetreike aan o.a. de sjoonst verkleide Sjnaak, ‘t sjoonst verkleide Mechelke, de sjoonste grop en eine sjpesjale Prinse Pries.
De kapelle die deilnumme aan ‘t Tröötekonkour zeen: kapel Aafsjlaag Zitterd, ’t Hermenieke, kapel Hou op die Kis, de Sjwaegelebend, kapel TisNiksentWurtNiks, Zaate Fanfaar Noots Biejein, Sjtadskapel ’t Trumke en ’t Tröötje en Trööt in de Gööt. Ouch de meis Jeugdige kapel van Zitterd, de Zittesje Kenjerkapel zal de luuj mit hun muzikaal klanke vermake.
Nao aafloup van ’t tröötekonkour zörge versjèllende DJ’s op de mert veur Vastelaovesmeziek.
Bron: De Marotte Zitterd
Foto: VastelaovendZitterd
