Jeederjaor verzörg de Marottekapel, de hoes kapel van De Marotte, de muzikaal omliesting bie de zittinge. Nao ‘t muzikaal oploestere van de zittinge van de Marotte organizeiert de Marottekapel mit de Vastelaovend weier häör tradisjoneel konzèrs.
‘t Eesjte konzer dat zie gaeve is ‘t Auw-Wieverkonzèr op donderdig 23 Fibberwarie. Vanaaf 21.11oer vermaak de Marottekapel onger leijing van jubbelaris Jan Hungens (1×11 jaor dirigent) de auw wiever en anger laammaekesj mit veural (auw) Zittesje Vastelaovesleidjes in kafee ’t Duvelke aan de Helsjtraot.
Op Vastelaovesmaondig organizeiert de Marottekapel veur de 4×11 de keer ’t tradisjonele Laammaekesjkonzèr. In 1974 waar Marcel Muyres jl. Sjtadsprins van Zitterd, ziene pap Marcel Muyres sr. Waar in dae tied de besjirmheer van De Marottekapel. Hae kwaam toen mit ’t idee om op Vastelaovesmaondig ein evenement te hauwte. De Marottekapel haet toen ein konzèr verzörg in ’t toenmalige kafee ’t Sieske aan de Riekswaeg, mit es naam ‘Siezekonzèr’. Toen rondj 1987 de oetbater van kafee ’t Siekse verhoesde nao ’t Gulickshoes verhoesde ’t konzèr van de Marottekapel mit. ’t Siezekonzèr woort toen omgeduip in ’t Laammaekesjkonzèr. Väöle jaore haet de Marottekapel toen op Vastelaovesmaondig in ’t Gulickshoes ein konzèr verzörg. Toen in 2003 de oetbater van ’t Gulickshoes koos veur mechanische meziek verhoesde ’t Laammaekesjkonzèr nao kafee de Buren op de Mert.
Nao twee jaor moosj de Marottekapel op zuik nao ein nuuj lokase, dees woort gevonje in kafee ‘de Vaan’ in ’t monumentale Ecrevissehoes aan de Helsjtraot. In 2013 kreeg ’t kafee nuuj oetbatesj en verangerde de naam van ’t kafee in ’t Duvelke, mer bleef de vaste plaatsj van ’t Laammaekesjkonzèr.
Op Vastelaovesmaondig vèngk in dit kafee ‘t 4x11de keer ’t Laammaekesjkonzèr plaatsj. De Marottekapel leet tössje 16.00 en 18.30oer de muzikaal Vastelaovesklanke door ’t Duvelke klinke. De Marotte zulle mit vors Marot Frits I en Sjtadsprins Bart II ein bezuik brenge aan ‘t Laammaekesjkonzèr.
Naeve de twee konzèrs is de Marottekapel ouch muzikaal te heure op ’t Kanon van ’t Balkon. Ongersjteund door versjèllende Zittesje zengesj blaoze zie de klanke van richtig Zittesje Vastelaovesleidjes euver de Mert.
Bron: De Marotte Zitterd
Foto: Ton Dirkx
