Op vriedig 10 Fibberwarie vèngk in Poppodium Volt ’t Sjnaakegala plaatsj. Dit evenement van De Marotte is sjpisjaal veur de jeug van 11 pés 14 jaor. De deure van Poppodium Volt zeen vanaaf 19.11oer geäöpent en de entree is gratis. Entree polsbendjes zeen te kriege in de Marottewinkel en bie de (basis)sjoole.
Aafgeloupe jaore waar ’t jeugevenement in kafees aan de Zittesje Mert. Dit jaor wieke De Marotte oet nao ’t Poppodium Volt. Dees lokase is bekender bie de jeug en auwwesj, zo haope De Marotte ’t evenement toegankelikker te make veur ein groter pebliek.
Hoewaal de naam van ’t evenement ‘Sjnaakegala’ is houf de jeug neit in gala kleiaasj nao Volt te komme. ’t Is ouch neit verplich om verkleid te komme, mer verkleid dreeg natuurlik waal bie aan de gezellige Vastelaovessfeer van deze aovend.
De meziek wurt deze aovend aafgesjömp op de jeug. DJ Jeroen wisselt hedendaagse meziek aaf mit sjwingende Vastelaovesmeziek. Ouch zulle versjéllende artiste optraeje op ’t podium van de groote zaal in Volt. Zo zal Fabrizio ein optraeje verzörge ‘Jao, Sjiek is mich dat! Ouch zulle deze aovend versjéllende finaliste van ’t Tiener Vastelaovesleidjes Konkour optraeje, wo onger de Zittesje Lisa mit ’t Marotte Tienerleidje ‘Dat is ’t ritme in mich’.
Wiejer is d’r eine sjminkhouk en kent de jeug in ein sjpisjaal fotolies oppe foto die ze metein kenne deile op social media. Tot sjlot zeen d’r leuke prieze te wenne tiejes ein quiz die in de loup van aovend wurt gehauwte door marije Wessels. Sjtadsprins Bart II zal same mit De Marotte de jeug komme bezuike en mitfeeste. ’t Belaof ein sjitterende, alcoholvrieje, aovend te ware veur de jeug van 11 pès 14jaor.
Terwiel de jeug aan ’t feeste is kénne de auwwesj in ’t kafee van Volt get drénke en op ein groot beeldsjerm kieke nao de finale van ’t Limburgs Vastelaovesleidjes Konkour.
De entree is gratis. Entree polsbendjes zeen verkriegbaar op de basissjole en in de Marottewinkel.
Bron: De Marotte Zitterd
Foto: De Marotte Zitterd
