Aafgeloupe jaor is ’t Optoch Kommitee gesjtart mit ‘t ‘Kerkes’ projek mit es doel om de jeug te sjtimuleiere om ‘kerkes’ (mini waages) te boewe veur veur de optoch. Dit projek waar al direk ein groot sukses, zelf ’t NOS Journaal en NOS Jeugdjournaal zeen opnames komme make in de Optochhal.
Nao ’t sukses van aafgeloupe jaor krig dit projek dit jaor dan ouch ein vervolg. Ten opzichte van veurigjaor zal de aanpak van ’t projek dit jaor nog waere verbaetert. Zo krig ’t projek dit jaor ein volledige boewplaatsj in de Optochhal en is geinvesteiert in de inrichting van de boewplaatsj en materiaal. ’t Optoch Kommitee is greuts d’r op dat ouch dit jaor weier ein aantal ervare waageboewesj/optochdeilnummesj onger leijing van Jan Schaekens en Math van Hooren de begeleiding van dit projek veur hun raekening numme.
Mitdoon:
Höb geen kénjer of kleinkénjer die allein of mit vrunj onger begeleiding van ervare waageboewesj eine eige mini Vastelaoveswaage wille boewe veur de Kénjeroptoch? Dan ként geer de kénjer aanmelje veur ’t kérkes-projek. Höb geen zelf gein kerke, gein probleem, dan sjtelt ’t Optoch Kommitee ein kerke in broekleen besjikbaar.
De kénjer kriege eesje ein intake gesjprek wo in ein eige idee en ein wirkteikening veur hun krease wurt gebaore. Vervolges gaon ze in de Optochhal aan de sjlaag onger begeleijing van eine ervare waageboewer. Mit häöm wurt ouch ein wirksjema gemaak, wobie ’t muigelik is om op versjéllende middige in de Optochhal aan ’t kérke te boewe. Dit alles mit es doel om mit ’t zelf gemaakte ‘kerke’ mit te doon aan de kénjeroptoch op zondig 4 Fibberwarie. De boewer/boewesj van ’t sjoonste kérke zal oet henj van de Zittesje Sjtadsprins de Ere Wimpel veur ’t sjoonste kérke ontvange en maag mittrekke in de Groote Optoch ein wake later.
Wilt geer uch opgaeve of wélt geer mee infermase euver ’t Kérkes projek of wélt geer ens komme kieke in de Optochhal, sjik dan eine e-mail mit eur gegaeves nao info@optoch.nl ‘t Optochkommitee zal dan kontak mit uch opnumme.
Bron: Optochkommitee Zitterd
Foto: RBZitterd / VastelaovendZitterd
