Zaoterdig 7 Jannewarie om 20.11 oer is in de Sirktent van de Limburgse Krissirk (Haspelsesjtraot) de oetruipingsaovend van de nuuje Zittesje Sjtadprins. De oetruipingsaovend ‘Cirque du Toon’ is ein unieke combinase van ’t bekende ‘Cirque du Marot, Sirk, Vastelaovend en Toon Hermans.
De oetruipingsavond kent tradisjoneel twee offisjeel momente. De bekendmaking van de Ridder in de Orde van de Pappegey en de oetruiping van de nuuje Sjtadsprins. Naeve dees offisjeel momente väöl humor en kolder, ein serieuze noot, leidjes van ‘Zitterds bekendste zoon’ Toon Hermans, optraejes van internasjonale sirkartiste, ein buut van Peter Vaessen, zangeres Marleen Rutten, Zittesje zengesj en de neudige verrasjinge. De muzikaal omliesting is in henj van de Marotte kapel. Samegeval eine aovend mit ‘Alleney Gekke Teun’, ’t jaormotte van De Marotte.
Es de klok 23.11 oer aangeef zal Vors Marot Frits I ‘t Tillegram van de Pappegey veurlaeze mit de naam van de 86e Stadsprins van Zitterd, dae volges trtadiese zelf neit aanwezig is. Aansjloetend zénge Bart en Lejao de Marottesjlaager 2017 ‘Wae oh Wae’, eine veur deze aovend heel toepasselikke sjlaager. Nao de oetruiping gaon De Bielemen van De Marotte op paad om de Zittesje kaffees ’t Tillegram van de Pappegey te brenge, zodat jeederein wét wae de nuuje Sjtadsprins wurt.
Kaarte veur de oetruipingaond zeen te koup in de Marottewinkel (damesmode Van Neer-Eijckel, Brandjstraot 11) en bie Toon Thuis (veurmalige V&D). Es in de veurverkoup neit alle kaarte zeen oetverkoch dan zeen vanaaf 19.45oer bie de sirk nog kaarte te koup.
Trök in de tied: De Oetruiping van de Marotteprins
De Marottesjlaager ‘Wae oh Wae’ besjrif dat ’t veur väöl Zitterder jaorliks weier sjpannend is wae de nuuje Sjtadsprins geit waere in ’t Marotteriek.
Tradisjoneel is dat in Zitterd op de oetruipingaovend allein de naam van de nuuje Sjtadsprins wurt bekendgemaak. Om ellef menuut euver ellef sjteig de sjpanning bie de aanwezige in de zaal es mit väöl sirremonieel Vors Marot de grote envelop äöpe maak om vervolges ’t Tillegram van de Pappegey veur te laeze. Jaorliks klink dan weier ein groot applaus door de zaal, ein eesjte teike van insjtömming, veur de keus van Vors Marot. ’t Is ein tradiese dat de aankommende Sjtadsprins dae zellef neit bie aanwezig is. Nao de oetruiping is veur de aankommende Sjtadsprins de sjpanning van ’t geheimhauwte dat hae de nuuj Sjtadsprins wurt veurbiej. De daag nao de oetruiping sjtruimp ’t nuuj Prinselikkepalies vol bie ’t ‘Aope Hoes’, wo menig Zitterder häöm kump filleseteiere mit zien aankommende Prinssjap.
Op 7 Jannewarie wurt de naam van de 86e Sjtadsprins van de in 1881 opgerichte Sjtadsvastelaovesvereiniging De Marotte bekende gemaak. Hie oet is op te make dat in ’t verleeje väöl jaore zeen ewaes wo in geine prins woort oetgroupe.
Zo trok de eesjte Sjtadsprins, Sjang Arnolds, pas in 1890 door Zitterd. Hae gouf, gezaete op eine triomfwage, de Zirttesje optoch ein anger cachet. Hienao moosj Zitterd weier 11 jaor wachte op eine nuuje Sjtadsprins. In 1901 waar op Vastelaovesmaondig eine broesjende optoch mit Zef America es tweede Sjtadsprins in de historie van De Marotte. Ouch aan ’t begin van de twintigste eeuw ware periodes zonger Sjtadsprins. Pas in 1911 kwaam d’r eine nuuje Sjtadsprins in de persoon van Nikkela Beckers oet Jaobaek. Hae woort gekaoze op ein zitting op 23 Jannewarie 2011. Weier ellef jaor later waas ’t Sjaak van Kempen dae in 1922 de hoogste gezagdraagder waas mit de drie dol daag.
In de auwdste kroniek van De Marotte wurt gewag gemaak van ’t bekendmake van de nuuje Sjtadsprins tiejes de zogenaamde Proclemasezitting. In welk jaor dat men is begonne mit ’t bekendmake van de nuuje Sjtadsprins via ’t Tillegram van de pappegey’ is precies bekend.
Ein denk is waal zeker: Op 7 Jannewarie geit weier veur eine Zittesje jong ziene ‘Prinsedruim’ werkelikheid waere.
Bron: De Marotte Zitterd
Foto’s: De Marotte Zitterd
