Nuuje Marotte CD ‘Veer zeen Zitterd’ geprizzenteiert

Jaorliks brènge de Marotte Zitterd ein Vastelaoves CD oet mit dao-op de nuuje Vastelaovessjlaagesj van ’t sezoen. Dit jaor wurt de Marotte CD kolleksie aangevuld mit ‘t 29e sjiefke mit es thema ‘Veer zeen Zitterd’, dat taeves ’t jaormotto van de Marotte is. De CD is bie de äöpening van ’t Vastelaovessezoen op 11 November geprizzenteiert.

De hoes van de CD is ein ontwerpe van Marc Webers van Studio MarQ. Marc haet zich laote inspireiere doort ’t auw sjtadswaope van Zitterd. ’t Waope is mit de hedendaagde besjikbare technieke sjpeels geintegreierd in de teks ‘Veer Zeen Zitterd’ en haet ein prominente plaatsj op de kleurrieke CD hoes. De produksie en opname van de CD ware ouch dit jaor weier in henj van Studio Theelen in Munstergelaen. Ongertössje ein samewirking van De Marotte en Studio Theelen van alweier 45 jaor, ein samewirking wo de Marotte greutsj op zeen.

De CD is vernuimp nao de wènnende sjlaager ‘Veer Zeen Zitterd’ en telt in totaal 8 nömmesj. De eesjte zös leidjes op de CD zeen de nömmesj 1 pés 6 van ’t Zittesj Vastelaovesleidjes Konkour (ZVK), mit de door Ed Geilen en Petro Willems gesjreve en door hun es duo Gein haor Baeter gezonge sjlaager ‘Veer Zeen Zitterd’. Leidje 2 ‘Kabàw’ wurt gezonge door Koeraasj en leidje 3 ‘Laef de Vastelaovend’ door ‘The Voice van Zitterd’ Cyrille Niël. ’t Jeugdige duo Sjtóm Toeval zéngk ’t leidje ‘Mós doe neit eine gaeve’ en Bart & Lejao zènge de ballade euver Zitterd ‘Blifs in mien hart’. Nömmer 6 op de CD zeen de debutante Jack & Ron mit ’t leidje ‘Waat is ein trumke zónger tröötje’, ein leidje mit eine knipaug nao ‘t 4×11 jaorig jubbelei van Sjtadskapel ’t Trumke en tröötje’.

Wiejer sjteit veur de tweede keer ein Marotte Tienerleidje op de CD. ’t Leidje mit es tittel ‘Veer gaon d’r veur!’ wurt gezonge dor Sterre Cuijpers. Ongertössje tradisjoneel op de CD is ’t Marotte Kènjerleidje. ’t Kénjerleide van dit jaor ‘Konfetti’ wurt gezonge door kènjer van Basissjool Euverhaove.

De CD is veur €12,95 te koup via de webshop van de Marotte (www.shop.marotte.nl) of bie de volgende verkouppunte: Kafee de Kup, Kafee ’t Sjterfhoes, Wollstreet, Primera, Fotografie Ton Dirkx, Eveline Mode en damesmodezaak Van Neer Eyckerler Mode. Vanaaf 16 December is de CD taeves te koup in de Marottewinkel.

Hoesontwerp: Marc Webers, Studio MarQ