De Wieze Raod van Sjtadsvastelaovesvereiniging De Marotte Zitterd haet versjterking gekrege in de persoon van de bienao 25-jaorige Mitchell Cremers, gebaore in Gelaen. In ’t dagelikslaeve is Mitchell bedriefsleider bie Gasterie Dobbelsteyn in Dooner. Hae is neit zo lang geleeje getrouwt mit de 23-jaorige Lisa.
Mitchell kent De Marotte oet de tied dat hae es ober wirkzaam waar in gemeinsjapshoes ‘de Baandert’. Hae keek toen altied al mit väöl bewonjering nao de opkoms van De Marotte, die ummer väöl indrök op häöm maakte. Dat saort Vastelaovend mit zien typische tradieses en gebroeke sjprik häöm waal aan. ’t Gevuil veur Vastelaovend is bie häöm langsem gekomme, De Marotte höbbe dat gevuil ein sjtuk versjnelt. Vruiger ging hae zelfs leever skiën dan vastelaovend viere….
Michell is eigelik es wederdeins veur Sirremoniemeister Maurice Indemans aktief begonne bie de aktiviteitekommise van De Marotte. Went Maurice haw veur häöm ouch get gedaon bie OVCS. Zo zuut men mer wie van ein en anger kent loupe!
Michell wilt d’r gaer veur zörge dat de jeug mee verbonje wurt mit de Vastelaovend en dus ouch mit De Marotte. Vastelaovend mot volges häöm ein fees zeen veur jeederein in Zitterd en omgaeving. Jongk, Awd, erm of riek, ’t maak neit oet. “De wirkelikheid mot mit Vastelaovend mit eine korrel zout waere genomme en van ’t laeve geneite”, aldus Mitchell.
In zien vrieje tied is de nuuje Marot trainer van OVCS JO 15-1 en van OVCS Dames 1. Ouch haet hae same mit ein aantal vrunj ein Vastelaovesgrop opgerich mit es naam ‘Sjtichting De Droeftoeters’ en dao is hae veurzitter van. Dit jaor haet hae mit deze grop ’t Leidjes Konkour in Doonder gewonne mit ’t leidje ‘Vastelaovestoer’.
Ziene pap haet jaorlangk es ober gewirk bie versjéllende Marotte zittinge in ‘de Baandert’. Op dees manneier haet hae heel get Marotte jaorordes gekrege. Zien vrouw Lisa kum oorsjprongkelik oet Eindhove, häöre pap is sirremoniemeister bie ein Eindhovense Carnavalsvereiniging. Zie moosj waal effe wénne aan de get angere vierrng van de Limburgse Vastelaovend, mer ongertössje is zie hie aan gewend en vengk zie de Limburgse en Zittesje Vastelaovend sjoon.
Bron: De Marotte Zitterd
Foto: Arjan Krijntjes
