’t Toon Hermans-jaor is dan waal veurbie, toch blif ouch in 2017 Toon Hermans prominent aanwezig in Zitterd. De expo Toon Thuis is verlengd en ouch op de nuuje Marotte jaororde 2017. De jaororde van De Marotte is veur ’t driede jaor op riej ontworpe door Luc Bormans.
De Jaororde is bedoeld es erkénning veur ’t werk van de väöle vriewilligesj en mitwirkesj bénne de grote ‘Marotteperpluu’. Ein Orde die me neit zomèr krig, me mot dao get veur door in ’t belang van de Zittesje Vastelaovend en/of De Marotte in Zitterd.
De jaororde kent ein heel lange tradiese. In ’t Marottelokaal hange de väöl auwe en kunszinnige jaorordes oet ’t verleje te pronke. In de loup van de jaore zeen op dees jaorordes allerlei ongerwerpe en thema’s aan bod gekomme.

Jaorliks is ’t ein oetdaging om weier mit get orzjineels te komme. Dit jaor waar de keus neit zo lestig door ’t Marotte jaormotto ‘Alleney Gekke Teun’. Mer ein motto mot nog altied waere omgezat in ein ontwerp. Lus Bormans haet Toon Hermans, Nederlands bete cabaretier en artistieke alleskenner aller tieje, vereeuwig in ein sober gestileiert profiel op de linkerkantj van de orde. Verrassjend geplaats op ein ongergrondj mit de teks van ein van zin bekendste Zittesje Vastelaovesleidjes ‘Oukouk’. Links baove sjtaon drie bölkes in de kleure rood, gael, gruin. De kleure rood en gael zeen ongerdeil van de naam TOON, vertikaal verbeelde de bökles gael en gruin ’t getal 100. Ein verwiezing nao ’t honderste gebäörtejaor van Toon, dae in 2016 honderjaor geleje in Zitterd is gebaore. Toon is in 2000 op 84-jaorige laeftied euverleeje.
De linkerkantj van de orde wurt aan de ongerkantj aafgesjlaote door de Vastelaoveskleure in de vorm van ein vaan. Aan de rechterkant eine anonieme Sjtadsprins, hoog gezate op eine Vastelaoveswaage in de vorm van ein Marottemötjs. De vaer van de mötjs löp get door aan de baovekantj van de orde miot rechts ’t jaortal 2017 en de naam Marotte Zitterd. Ouch noe weier oetgebeeld in frisje kleure. Al mit al weier ein artistiek hoogsténdje van ontwerpe Luc Bormans. Net es anger jaore is de orde gemaak in ’t Dutjse Bonn. Wederom ein kleinnood dat in ’t sezoen greutj ként waere gedrage.
Jack Vahsen maak jaorliks ein grote verzie van hout dae gebroek wurt bie versjéllende (binne) evenemente. De jaororde is es ‘pinke’ te koup veur sjechs €3,50 bie o.a. De Marottewinkel, fotograaf Ton Dirkx, damesmode Eveline (Lömmericherveldj) en via de webshop van De Marotte (www.marotte.nl/shop).
Bron: De Marotte Zitterd
Foto: Arjan Krijntjes / De Marotte Zitterd