Offesjeel is hae al versjéllende maondje in funksie, mer vanaaf de 11de van de 11de maag jeederein ’t weite dat Luc Jacobs de opvolger is gewore van Peter Jamar es commandant van de Prinsegarde Zitterd.
’t Is neit gans verwonjerlik dat de jonge Luc Jacobs (22jaor) woort gekaoze pes commandant. Op dit moment is hae zelfs ’t langste van allemaol lid, went in 2001 woort hae al es viefjaorige jong lid van de Garde. Ouch dat waas neit toevallig, went in die periode waar ziene pap Thijs Jacobs, de huidige ‘Protokollis’ van De Marotte, aktief bénne de Garde. De bekende appel velt dus neit weit van de boum.
Luc woort gevraog zich besjikbaar te sjtelle es nuuje commandant en nao ein gesjprek sjtelde Luc zich ouch besjikbaar en woort gekaoze.
Puberruil
Veur Luc en zien femieje is Vastelaovens ein serjeuze zaak en beheers ein groot deil van hun laeve.
In 2012 sjpeelde Luc de haufrol in ’t KRO-pregram ‘Puberruil’. Luc, dae niks haet mit sjtadse ‘Hollenjers’, moosj in ’t pregam in ’t hol van de leeuw ein gedich veurdrage op ein podium in hertje Amsterdam. Eine zekere Dick oet Amsterdam moosj duuke in de Zittesje Vastelaovend. Allebei höbbe ze zeer genaote volges Luc en ’t pregam gouf taeves eine angere kiek op Vastelaovend. OP 25 September 2012 woort ’t pregram op TV oetgezonje en ruum bekeke. Ein ganse belaevenis veur häöm in dae tied.
Luc haet same mit Maurice Jessen versjlaag gedaon van de Kénjeroptoch, wo hae de kenjer interviewde onger de optoch en is hae ouch aktief bie Marotte TV. Nae eesj te höbbe gewirk es commercieel mitwirker binnedeins bie Leeuwenborg, is hae noe aktief es media adviseur bie Bur046. Daonaeve volg hae in deiltied de HBO-opleijing bacheler commerciële economie.
Bron: De Marotte Zitterd
Foto: Arjan Krijntjes
