De Marottekapel is de hofkapel van De Zittesje Sjtadsvastelaovesvereinging De Marotte. Zie verzörgde saer de oprichting in 1949 veur de muzikaal ongersjteuning. De Marottekapel sjpeelt veural Zittesje (Vastelaoves)leidjes en dreeg op dees mennerier dit muzikaal erfgoud euver van ginnerase op ginnerase.
Saer 2006 sjteit Jan Hungens es dirigent veur de Marottekapel. Dit sezoen viert hae zien 11 jaorig jubbelei. Veurdat hae es dirigent begoosj maakte hae es trompetis al deil oet van De Marottekapel. Jan Hungens: “Ich sjpeelde in dae tied bie de Strabante, ein meziekgezelsjap oet Munstergelaen, en waar betrokke bie de Aubelband. Gezeen miene muzikale achtergrondj en ervaring woort ich door Jos Janssen gevraog om oet te helpe bie de Marottekapel, omdat hunne trompetis oet vriejesjvuit waar in Zuid-Dutsjlandj”. Nao dit optraje bleef Jan onaafgebraoke bie de Marottekapel.
“Toen ich bie de Marottekapel kwaam, woort deze geleid door Hugo Kamps. Same mit Peter Kunkels vormde hae toen ouch ein trompetduo, wodoor hae in ’t Vastelaovessezoen reigelmaotig aafwezig waar door optraejes”, verteld Jan euver zien beginperiode bie de Marottekapel. “Hugo vroog mit toen of ich de leijing van de rippetieses wilde euvernömme op de momente dat hae aafwezig waar. Dat deeg ich natuurlik en toen Hugo in 2006 aangouf te sjtoppe bie de Marottekapel, höb ich de muzikaal leijing van häöm euvergenomme”.
Jan is d’r greutsj op dat de Marottekapel zo väöl Zittesje meziek in ’t rippertior haet. Wo ze in zien beginjaore nog leidjes oet beveurbeeld Venlo of Mesjteich sjpeelde, zeen dat noe veurnamelik Zittesje Vastelaovesleidjes. Jan: “Ich sjteur mich dan ouch soms aan de Zittesje kapelle die op ’t tröötekonkour Engelstalige top-40 meziek sjpele. Laote veer ooze gebaortesjtad troew blieve en ozze muzikale waarde in sjtandj hawte”, zo hiltj hae ein vurig pleidooi veur de Zittesje Vastelaovesmeziek.
In de 11 jaor es dirigent haet Jan mit de Marottekapel väöl muzikale hoogtepunte maoge mitmake. ’t Begin van ’t sezoen blif veur Jan jaorliks weier ein bezunjere periode mit de oetruipingsaovend van de nuuje Sjtadsprins, insjtelasezitting en alles wat dao bie kump kieke. ’t Absoluut hoogtepunt van ’t sezoen is veur Jan ’t optraeje bie ’t kanon van ’t Balkon es de mert volsjteit mit doenzende luuj. Bezunjer is dat De Marottekapel bie dit optraeje wurt vergezeld door Zittesje zengesj es Paul-Jean Jessen, Jan van Daal, Math Dirkx, Ron Hunnekens of Fieny Moerskofski. De sjteun van dees Zittesje zengesj geef de 75-jaorige dirigent de drive om veurluiping nog door te gaon. “Ich zal neit tot mien 80e blieve doen, mer de sjtimulans om door te gaon, is veur mich ’t feit dat de jonges die ich dirigeier same mit mich de Zittesje Vastelaovesmeziek in sjtandj hawte”.
Bron: De Marotte Zitterd
Foto: Arjan Krijntjes
