Instelasezitting Sjtadsprins Bart II

2017 Prins

Zaoterdig 21 Jannewarie om 20.00 oer is in de grootezaal van de Sjtadssjouwburg ‘De Domijnen’ de insjtelasezitting van Sjtadsprins Bart II. De insjtelasezitting is ein zitting die in ‘t teike sjteit van komme en gaon, mer dan in omgedreejde volgorde.

In ‘t gedeilte veur de pauze sjteit nog eine keer de dan nog regeierende Sjtadsprins Sander I centraal. Es eesjte wurt Sjtadsprins Sander ‘geplök’ en mit hae volges protocol achtereinvolgend de scepter, de vaere, de prinsemutsj, de ketting mit de nonnevot en ’t verke en de ketting mit ’t sjlaateveugelke en ‘t pappegeyke inlevere. Nao ‘t plökke zal de dan ex prins Sander van Goethem zien dankwoord oetsjpraeke en trök kieke op zien Prinssjap.
Aansjloetend brenge de Auwt Prinse hun tradisjonele Grosse nömmer. Wie zie op de regeierperiode van Sander trök kieke zal blieke in de Grosse Nömmer. Waat en wae de auwt prinse in hun Grosse nömmer onger de loep numme is wie gebroekelik geheim, mer zal zeker weier bol sjtaon van de hilariteit.

Regeierend Sjtadsprins en aankommende Sjtadsprins Bart Offermans zeen allebei muzikant bie Hermenie Sint Joseph

Nao de pauze sjteit Bart Offermans centraal. Mit ein kolderieke ekt wurt Bart op de buun gebrach door femieje, vrunj, buurt en vereiniginge. In dees ekt väöl illemènte die verwieze nao de nuuje Sjtadsprins, aktuweel zake en ein knipoug nao ’t Marotte jaormotto ‘Alleney Gekke Teun’. Bart sjtudeiert genaeskunde aan de Universiteit in Mesjtreich en aangezeen meziek make bie Hermenie Sint Joep en de Paekkapel en tennis bie tennisvereiniging S.L.T.C. de hobby’s zeen van Bart zulle dees illement zeker ein rol höbbe in dees ekt van ‘t opbrénge.

Aansjloetend aan ’t opbrènge zal Bart door Vors Marot Frits offisjeel geinsjtelleiert waere pès Sjtadsprins Bart II. Nao ‘de aed op ut Marotte vaenke’ krig hae de bie zien Prinssjap beheurende teikes oetgereik, woonao hae offisjeel es Sjtadsprins Bart II euver ‘t Zittesj Marotteriek zal regeiere. Nao ‘t veurlaeze van zien Proklamase zal hae veur de eesjte keer zien Prinse motto ten geheure brenge.

Aan ’t enj van de zitting trakteiert Sjtadsprins Bart II mit de tradisjonele nonnevotteraege alle aanwezige op ein richtig Zittesje nonnevot. De muzikaal omliesting is henj van de Marottekapel, nao aafloup van de zitting is in de kleinezaal van de sjouwburg ‘t Prinsebal mit meziek van DJ Wouter.

Kaarte veur de insjtallase zitting koste €12,50 en zeen te koup in de Marottewinkel op de Brandsjtraot bie Van Neer-Eijkeler (donderdig 10-14oer en zaoterdig 10-17oer) en bie de Oetbalie van de Sjouwburg.

Bron: De Marotte Zitterd
Foto: Arjan Krijntjes