In ‘t Marottelokaal is gisteraovend, 26 juni, de veurseleksie gewaes veur de verkeizing van ’t Zittesje Vastelaovesleidjes Konkour 2017-2018. De 23 lede van de zjurie beloesterde de 14 ingezonje leidjes die woorte gezonge door de zéngesj René Dirkx, Paul-Jean Jessen, Marc Verblakt en Karin Colaris, begeleid door Wiel Bonten op de piano.
De zjurie van de veurseleksie, onger toezich van notaris mr. Tim Gielens, besjong oet Sjtadsprins Bart II, aafgevaardige van Prieswennesj oet de groote optoch 2017, lede van de Prinsegarde, zaatehermeniekes, hermenieje, waageboewesj, pers en leerkrachte van Basissjool Euverhaove. Dees sjool zal kommend sezoen ’t Marotte kènjerleidje verzörge.
De zjurie haet de ingezonje leidjes beoordeilt op o.a. muzikaliteit, orzjinaliteit, Zittesj dialek en de melodie.
Nao ’t telle van de sjtömme, haet Sjtadspruins Bart II onger toezich van de notaris de laoting verrich veur de volgorde in de finale van ’t Zittesj Vastelaovesleidjes Konkour 2017-2018.
De volgende 11 leidjes höbbe de finale bereik:
1. ‘Blifs in mien hart’; t&m: Sjon Smeets en Gian Prince
2. ‘Gaef mich mèr’; t&m: Rob Hodselmans
3. ‘Ós vastelaovesreünie’; t&m: Peter Schaeks
4. ‘Kabáw’; t&m: Thei Wessels
5. ‘Ómdat ’t kènt’; t&m: Jan Dieteren
6. ‘Veer zeen Zitterd’; t&m: Ed Geilen en Petro Willems
7. ‘De prins is ózze dirigent’; t&m: Phil Schaeken
8. ‘Laef de vastelaovend’; t&m: Cyrille Niël
9. ‘Waat is ’n trumke zónger träötje’; t&m: Guus Steinen
10. ‘Wie kumpse drop’; t&m: Miriam en Theo Bartels
11. ‘Mós doe neit eine gaeve’; t&m: Ger Muijrers
De 11 finale leidjes waere in de finale van ‘t Zittesj Vastelaovesleidjeskonkour laif gezonge door Zittesje zengesj en zengeresse. ’t Leidje mit de meisjte sjtömme wurt de Zittesje vastelaovessjlaager veur ‘t sezoen 2017-2018, de sjriever/kompenis krig de Thei Hunnekens wisseltroffee oetgereik.
De verkeizing van de Zittesje vastelaovessjlaager is dit jaor weier op de tradisjonele zaoterdig van Sint Rosa, 26 Augustus, in Poppodium Volt!
Bron: De Marotte Zitterd
Foto: De Marotte Zitterd
