Op zaoterdig 18 Meert organizeiert ’t Optoch Kommitee de film en naokaart aovend. Deze aovend, dae om 19.33oer begint, vèngk plaatsj in de Optochhal en is veur jeederein gratis toegankelik. Bewus is gekaoze veur eine datum kort nao de Vastelaovend zodat de filmaovend taeves ein sjoon moment is om nog èns same trök te kieke op de Vastelaovend.
In de optochhal wurt ein gezellig pleintje ingerich mit sfeervolle verleichting en mit de Vastelaoveswaages die in de optoch höbbe mit getrokke es groot dekor. Zittend aan taofels of sjtaond aan sjtehtissje is de muigelikheid om same onger ’t genot van ein drènkske trök te kieke op de Vastelaovend en nog ens te geneite van de beelde van de Optochte.
’t Optoch Kommitee prizzenteiert deze aovend de Optochfilm van de Groote Vastelaoves optoch welke net es de beelde van de Kènjeroptoch en historische beelde van optochte oet ’t verleje de ganse aovend doorloupend te bekieke zeen. Taeves is op LCD-sjerme ein prizzentase van foto’s van ’t aafgeloupe sezoen. Ouch de cocktailbar is dit jaor weier prezent.
Bron: Optochkommitee Zitterd
Foto: VastelaovendZitterd
