De Greutsje Pin 2018 is geprizzenteiert

Op de 11de van de 11de haet Klup Kump Gout veur veufde maol de Greutsje Pin geprizzenteiert. De Greutsje Pin is ontworpe door Marc Webers van Studio MarQ en haet ein oplage van 2500 sjtök, de pries is wie gebroekelikke €5,-

De GreutsjePin 2018
De Greutsje Pin 2018

De Greutsje Pin is ein sjpèngske dat jeedere Vastelaovesgek op ziene revaer of patsj kent sjtaeke es teike dat hae greutsj is op Zitterd en ziene Vastelaovend. Mit ’t koupe van “De Greutsje Pin” sjteunt me de deilnummende vereiniginge die de Vastelaovend in Zitterd oetdraage en insjtandj hauwte, de opbrengs van De Greutsje Pin geit rechsjtreeks nao de deilnummende vereiniginge.

Bie de prizzentase van de Greutsje Pin haet Klup Kump Gout eine cheque van €1111,- overhandig aan Peet van Erp, de veurzitter van ’t Optochkommitee. Mit dit bedraag wurt ’t ‘Kerkes Projek’ ongersjeund, dat veurigjaor door ’t Optochkommitee is gesjtart om de jeug te sjtimuleiere om ‘kerkes’ en waages te boewe veur de Optochte.

De Greutsje Pin te koup biej de deilnummende vereiniginge en onlain via de webshop. Mee infermase euver De Greutsje Pin en de deilnummende vereiniginge is te vènje op de websait van de Greutsje Pin: www.degreutsjepin.nl.

Foto’s: RBZitterd / greutsjepin.nl