De Marotte äöpene op de 11de van de 11de ’t Vastelovessezoen 2017-2018. De äöpening van ’t Vastelaovessezoen vengk plaatsj op Kloosterplien in Zitterd, in samewirking mit hermenie Sint Joep wurt gezörg veur ein drenkske. ’t Kloosterplien zal waere verlich en in Vastelaovessfeer aangekleid pes ein sfeervol Vastelaovesplein. Bie de äöpening van ’t sezoen zulle naeve De Marotte mit Sjtadsprins Bart II en de Marotte Perpluu vereiniginge ouch Vastelaovesvereiniginge van ‘Groot Zitterd’ prezent zeen wo onger CV de Narre oet Euverhaove mit hunne nuuje Vors.
Op ’t pregram sjteit väöl meziek en versjillende offisjele momente. Zo zal Klup Kump Gout De Greutsje Pin 2018 prizzenteiere en wurt op ein bezunjere meneier de klok gesjtart die geit aaftelle nao Vastelaoveszaoterdig 23.11oer
Om 18.30 oer sjtart ’t pregram mit de klanke van de Marottekapel, vervolges wurt de nuuj Marotte CD geprizzenteiert. Kenjer van Basissjool Euverhaove zenge ’t Marotte Kènjerleidje ‘Konfetti’ en Sterre Cuypers brengk ’t Marotte Tienerleidje ‘Veer gaon d’r veur!’. De top 6 van ’t Zittesj Vastelaovesleidjes konkour is te beloestere, mit natuurlik dao bie de nuuje sjlaager ‘Veer zeen Zitterd’, gezonge door Gein Haor Baeter.
De Geliënde oet Hulsberg wonne aafgeloupe jaor ’t LVK en zulle mit hun leidjes zörge veur de neudige sjtömming. Wiejer zeen d’r optraës kapel TisNiksentWurtNiks, brènge Bart & Lejao de sjlaager van aafgeloupe jaor ‘Wae oh Wae’, zal Cyrille Niël ‘The voice of Zitterd’ versjèllende Zittesje Vastelaovesleidjes brenge en zo wie me dat zaet en nog mee en nog mee en nog väöl mee.
Bewus höbbe De Marotte gekaoze de äöpening van ’t Vastelaovessezoen op ein vruig tiedsjtip op de aovend te hauwte, zodat is muigelik is om mit de ganse femieje nao de äöpening van ’t sezoen te komme. De entree is gratis!
Enigszins verkleid komme zörg veur eine richtige Vastelaovessfeer, mer is natuurlik neit verplich.
Nao de äöpening van ’t Vastelaovessezoen geit ’t fees wiejer in de Zittesje kafees. In de kaffees zörge de kasteleins veur toepasselikke meziek en optraejes om al in de richtige Vastelaovessjtömming te komme.
Bron: De Marotte Zitterd
Foto: RBZitterd / VastelaovendZitterd
