In ein vol en sfeervol Poppodium Volt is gisteraovend de Zittesje Vastelaovessjlaager veur Vastelaovessezoen 2016-2017 gekaoze. Alle ellef de leidjes die in de finale sjtonge woorte laif gezonge door Zittesje zengesj, wobie de meziek dit jaor al eerder waar opgenomme. De zjurie onger leiding van Notaris Tim Gielens besjtong oet ein vak- /prominentezjurie mit zangdocente en zangeres Marlou Obers, zangeres en LVK-finaliste Katja Henz, Tweede Kamerlid Martijn van Helvert en koordirigent Wiel Bonten en alle aanwezige die op ‘t sjtömbiljet hunne top 3 koosje invulde.
Nao ’t telle van de sjtömme kwaam es winnaer nao veure ‘Wae oh Wae’ gesjreve door Sjohn Smeets en Gian Prince. De nuuje sjlaager wurt gezonge door ’t duo Bart Barrios en Lejao Beursgens. Oet henj van Marianne Hunnekens-de Kok en Sjtadsprins Sander I kreege Sjohn en Gian de Thei Hunnekens wisseltroffee oetgereik. Veur Sjohn en Gian is dit de 11de keer dat zie ’t Zittesj Vastelaovesleidjeskonkour wènne.
Op de tweede plaatsj eindige Petro Willems en Ed Geilen mit ‘Rundje Vastelaovend’ dat door hun wurt gezonge es duo Gein Haor Baeter. De driede plaatsj ging nao de wennesj van veurigjaor Chrissy en Guus Steinen mit ’t leidje ‘Sjtedje van veier seizoene’, dat wurt gezonge door nuuje grop Don Kiesjon mit oa Guus en Chrissy.
Naeve de de top 3 komme ouch de nömmesj veier pes zös op de nuuje Cd te sjtaon. Dat zeen ‘Vuur van Vastelaovend’ gesjreve door Thei Wessels en gezonge door Paul-Jean Jessen, ‘Ich höb ’t Al Aaf’, van debutant Tom Bloem en gezonge door Sjtom Toeval (Maxime Tummers en Thierry Dirkx) en tensjlotte ‘Wakker Waere mit Vastelaovend’ dat is gesjreve door Wim Claessen en Bert Poyk en wurt gezonge door Fieny Moerskofski en Jan van Daal.
Naeve de veier wennende leidjes kump op de nuuje Marotte CD weier ein kènjer Vastelaovesleidje te sjtaon. ’t Leidje van dit jaor ‘Oppe Tied’ is gesjreve door Marlou Obers en wurt gezonge door kenjer van Basissjool Gustav Hoefer. Naeve ’t Kenjerleidje kump dit jaor veur deeesjte keer ein Tiener Vastelaovesleidje te sjtaon. Dit leidje mit is tittel ‘Dat is ’t ritme in mich’ is gesjreve door Guus Steinen en wurt gezonge door Lisa Schiffler. De nuuje Marotte CD is vanaaf eind November te koup in onger angere de Marottewinkel.
Foto’s: VastelaovendZitterd
