Mit de zomer veur de deur wurt ouch al oetgekeke nao de Vastelaovend 2017. De aanzèt veur ’t nuut Vastelaovessezoen is tradisjoneel de verkeizing van de nuuje sjlaager. ’t Zittesj Vastelaovesleidjeskonkour is dit jaor neit wie gebroekelik op Sint Rosa zaoterdig, mer op Zaoterdig 10 September e.k.
Sjrievesj en kompeniste kenne pés maondig 6 Juni ein of meerdere leidjes insjikke veur de verkeizing Zittesje Vastelaovessjlaager 2016. Bie mee es 11 inzendige wurt ein veurseleksie gehauwte. De zjurie van dees veurseleksie besjteit onger angere oet Muzikante, Veldeke, toneel, leede van Vastelaovesvereiniginge, Pries winnaesj oet de Optoch 2016, Ridder in de Orde van de Pappegey en Sjtadsprins Sander I. Lede van De Marotte höbbe gein sjtömrech.
In de finale van de verkeizing Zittesje Vastelaovessjlaager op zaoterdig 10 September waere de 11 finale leidjes laif gezonje door Zittesje zengesj en zengeresse en laif begeleid door ein orkes. Aan ut enj van de aovend is dan bekend welk leidje de opvolger wurt van de door Chrissy Steinen en Guus Steinen gesjreve Vastelaovessjlaager 2016 ‘Same is Sjoonder’. De wènnende sjreiver/komponis krig de Thei Hunnekens Wisseltrofee oetgereik.
De leidjes die waere ingesjik motte aan ein aantal veurwaarde voldoon:
- De teks en meziek motte orzjineel zeen, mage neit eerder in ‘t aopenbaar ten geheure zeen gebrach en deine gemaak te zeen mit de intentie om deil te numme aan ’t Zittesj vastelaovesleeidjes Konkour
- De teks mot in ’t Zittesj-plat zeen gesjreve en/of gezonge zeen
- De meziek deint in noote-sjrif genoteiert te zeen, bie veurkeur in ‘Sibelius’. De teks mot onger de melodielien waere gesjreve
- De teks deint taeves apaart es Word-besjtand aangelevert te waere
- Ein onbeperk aantal leidjes maag waere ingezonje, mer per sjriever/kompenis kent mer ein leidje in de finale komme
- Bie ‘t insjikke van ein leidje kriege de Marotte ‘t allein rech om ‘t leidje op CD oet te brenge
- Daonaeve vraoge de Marotte om de inzendig te veurzeen van een Word-besjtandj mit eine korte oetlegk wao ‘t leidje euvergeit, dit om de zjurie ein baeter inzich te gaeve bie ‘t leidje.
De insjrieving veurzeen van naam van de sjriever en/of kompenis, adres, e-meel en tillefoonnömmer en veur maondig 6 Juni opgesjtuure of aafgegaeve bie de Protocollis van de Marotte Thijs Jacobs. Insjikke ként via Posbus 256, 6130 AG Zitterd of Jan van Stevensweertsjtraot 9, 6137 AR Zitterd. Veur vraoge of onduudelikhede kent geer kontak opnumme mit de Protokolis van De Marotte Thijs Jacobs secretaris@marotte.nl
Bron: De Marotte Zitterd
Foto: Ton Dirkx
