Op Zaoterdig 10 September is ’t Zittesj vastelaovesleidjes Konkour en wurt de nuuje Zittesje Vastelaovessjlaager veur Vastelaovessezoen 2016-2017 gekaoze. Angesj es normaal is de verkeizing dit jaor neit op de tradisjonele zaoterdig veur Sint Rosa. Door ’t laat valle van de vakansie dit jaor ware väöl mitwirkesj aan de leidjesaovend nog op vakans en is noodgedwonge oetgeweke nao twee waeke later es normaal. Ondanks dat de leidjesaovend dit jaor twee wake later is, is Zitterd nog altied de eesjte plaatsj in Limburg wo de nuuje Vastelaovessjlaager wurt gekaoze.
De lokase is ouch dit jaor weier Poppodium VOLT! aan de Odasingel. De zaal is geaopend vanaaf 19.33 oer en de verkeizing begint om 20.33 oer. De entree per bezuiker vanaaf 12 jaor is €3,-, dat is inklesief ein buikse mit alle tekste en sjtömbiljet en ein Marotte pen.
Tradisjoneel begint de aovend mit ein trökblik op ’t aafgeloupe sezoen. Om de zaal alvas op ter werme zènge Chrissy en Monique nog eine keer de Vastelaovessjlaager 2016 ‘Same is Sjoonder’. Chrissy Steinen en Guus Steinen, de sjrievesj van de Vastelaovessjlaager 2016, zulle aansjloetend de Thei Hunnekens Wisseltrofee inlevere woveur zie in de plaatsj ein oorkonde es herinnering kriege.
Ouch angesj es anger jaore is dat dit jaor gein laif orkes zal zeen, mer de meziek is veuraaf al opgenomme. Waal waere de leidjes laif gezonge door Zittesje zengesj. De zjureiering vèngk plaatsj door alle aanwezige en ein vak-/prominentezjurie.
Nao ein pauze es de sjtömme waere geteld wurt de oetsjlaag bekend gemaak. ’t Leidje dat op de eesjte plaatsj eindig wurt de nuuje Zittesje Vastelaovessjlaager veur ’t Vastelaovessezoen 2016-2017. De sjreiver van de wennende sjlaager reike Sjtadsprins sander I en Marianne Hunnekens – de Kok de Thei Hunnekens Wisseltrofee oet. De trofee is vernuimp nao de väöl te vruig euverleje Thei Hunnekens, dae de grondjlegger en jaorelangk drievende krach waas achter ’t oetbrènge van Zittesje Vastelaovesleidjes op LP’s en CD’.
Ongersjtaonde 11 leidjes höbbe dit jaor de finale van ’t Zittesj Vastelaovesleidjes Konkour gehaold:
- “Sjtedje van veier seizoene”; Teks: Chrissy Steinen en Guus Steinen, Meziek: Chrissy Steinen
- “Laammaekerie”; Teks en Meziek: Phil Schaeken
- “Wae oh wae”; Teks en Meziek: Sjon Smeets en Gian Prince
- “Mit Vastelaovend blief ich neit thoes”; Teks en Meziek: Ger Muijres
- “Ich höb ’t Alaaf”; Teks en Meziek: Tom Bloem
- “’t Maak neit oet”; Teks en Meziek: Maurice Indemans
- “Marie van ós hermenie”; Teks: Peter Schaeks en ben Erkens, Meziek: Jo Deusings
- “Rundje Vastelaovend”; Teks en Meziek: Ed Geilen en Petro Willems
- “Dao zak mich de boks van aaf”; Teks en Meziek: Miriam Bartels
- “’t Vuur van vastelaovend”: Teks en Meziek: Thei Wessels
- “Wakker waere mit Vastelaovend”; Teks en Meziek: Wim Claessen
Bron: De Marotte Zitterd
Foto: Ton Dirkx
