Sfeervolle äöpening van ‘t Vastelaovessezoen

Op de 11de van de 11de woortin Zitterd ‘t Vastelaovessezoen geäöpent op ‘t Kloosterplien. Ondanks dat de opkoms neit zo massaal waar es beveurbeeld in Mesjtreich waas ‘t gezellig drök en veural eine sfeervolle äöpening van ‘t Vastelaovessezoen. De wènnende leidjes van ‘t Zittesj Vastelaovesleidjes Konkour woorte gezonge door Fieny&Jan, Paul-Jean Jessen, Sjtom Toeval, Gein Haor Baeter en Bart&Lejao zonge de nuuje Marotte sjlaager ‘Wae oh Wae’. Wiejer ware d’r optraës van Lisa mit ‘t eesje Marotte Tienerleidje, Koeraasj en kapel Hou op die Kis die de äöpening muzikaal oploesterde. De nuuje grop Don Kiesjot belaefde hunne primeur in Zitterd en hun optraeje veil zichbaar in de sjmaak bie de aanwezige die al volop mitzonge en sjoenkelde. De topper van de aovend ware de LVK wènnesj Spik & Span, die ‘t Kloosterplien mit hun leidjes leite ‘Krake’.

De offisjeel äöpening van ‘t Vastelaovessezoen woort verrich door Vors Marot Frits I, Sjtadsprins Sander I en de Prinse van versjèllende Vastelaovesvereiniginge oet Groot-Zitterd door ‘t onthulle van de klok die geit aaftelle pes Vastelaoveszaoterdig 23.11oer. Ein letterlik hoogtepunt van de äöpening waas ‘t moment dat de Marottekapel Hoog ‘t Rood, Gael, Gruin sjpeelde vanaaf de taore van de Groote Kirk.

Anger offisjeel momente ware de prizzentase van de Greutsje Pin 2017 en de onthulling van ‘t marotte jaormotto. Dit jaor höbbe de Marotte gekaoze veur ‘t jaormotto ‘Alleney Gekke Teun’, ein hommaasj aan Toon Hermans dae dit jaor 100jaor zou zeen gewore. Onger angere op de hoes van de nuuj CD en op affiches zal dit motto mit ein foto van Toon Hermans zeen trök te vènje.

De äöpening woort aafgesjlaote door kapel Aafsjlaag Zitterd mit in hun midde Sjtadsprins Sander I, wonao de sezoensäöpening zich verplaatsjte nao de kaffees en ‘t nog lang gezellig bleef.

Foto’s en Video: VastelaovendZitterd