Jaorliks reik de Prinsegarde Zitterd op 111 daag veur de Vastelaovend Nonnevotte oet aan luuj die zich de aafgeloupe jaore bezunjer höbbe ingezat veur de Zittesje Vastelaovend. Dit gebroek is in de jaore 70 ingezat door de Kroenekrane en maag mit eech ein Zittesje Tradiese waere genuimp. De letste jaore wurt dees tradiese in sjtandj gehauwte door de Prinsegarde Zitterd.
Vaste ontvangesj van ein Nonnevot op 111 daag veur de Vastelaovend zeen Vors Marot, de regeierende Sjtadsprins en Burgemeister Sjraar Cox, zie kriege de Nonnevot thoes oetgereik. Ouch Marot Wil Simons ontvèng ein Nonnevot veur zien hulp bie de restyle van de website van De Prinsegarde.
Ein aantal persone waere jaorliks door de Prinsegarde Zitterd in ’t zönke gezat en waere oetgroupe pès prominent. Dees persone kriege op 111 daag veur de Vastelaovende de Nonnevot oetgereik onger ’t genot van ein hepke en drenkske in Tapperie de Gats. Dit jaor waas dees eer veur de dames van de Dörpelmaeg die dit jaor hun 5×11 jaorig jubbelei viere.
Eine persoon wurt door de Prinsegarde jaorliks extra in ’t zönke gezat en krig ein extra grote Nonnevot oetgereik, dees eer veil dit jaor te beurt aan Thijs Jacobs, de Protocolis van De Marotte. Thijs woort in 1991 lid de Prinsegarde Zitterd, wo hae in 2002 de functie van sikkeretaris kreeg. In 2004 woort Thijs aktief es kemmisselid bie de Marotte en woort 2007 lid van de Wieze Raod van de Marotte. Bie ziene euversjtap van de Prinsegarde nao de Marotte woort Thijs benuimp pes Ere-lid van de Prinsegarde. Saer 2012 is Thijs de Protokolis van De Marotte. In zien dankwoort sjtong Thijs ouch sjtil bie ’t gemis van de dit veurjaor plotseling euverleeje Lei Hulsmans, de sikkeretaris en zeer gewardeierd lid van de Prinsegarde.
Veurgengesj van Thijs die de grote Nonnevot krege oetgreik zeen onger angere Groot Vors Fernao, Vors Marot Harie I, Pierre Dieteren, Peet van Erp, John Smeets en Joep Wijnands.
Bron: Sittard-Geleen.nieuws.nl
Foto: Sittard-Geleen.nieuws.nl
