De letste jaore zette De Marotte op de Marotte CD ein sjpisjaal Kénjer Vastelaovesleidjes dat aafwisselend wurt gezonge door kenjer van de Basissjole en wurt ingezonje nao ‘t KVL.
Dit jaor sjteit op de Marotte CD veur de eesjte keer naeve ‘t Kènjervastelaovesleidje ouch ein Tienerleidje dat wurt gezonge door Lisa Schiffler. Dit tienerleidje ‘Dat is ‘t Ritme in mich’ is gesjreve door Guus Steinen en is de Zittesje inzending veur ‘t TVK, ‘t LVK veur de tienesj van 13 pés 17jaor.
Gisteraovend waar in Dieteren de TVK-Workshop (veurronje) en woorte door de zjurie de finaliste gekaoze van ‘t TVK 2017. De deilnummende tienesj sjtélde zich veur via hunne vlog en prizzenteierde hun leidje. Nao aafloup zeen door de zjurie 14 finaliste bekend gemaak en kreeg ouch Lisa ein finaleplaatsj. Ein super prestasie dat Lisa mit ‘t allereesjte Marotte Tienerleidje ooit de finale haet wiete te bereike. De finale van ‘t TVK is op zaoterdig 4 Fibberwarie in Velden.
Foto: De Marotte Zitterd
