Bie aanvangk van ’t nuuje Vastelaovessezoen hauwe De Marotte intern get te viere. Roger Bormans woort lid van de Wieze Raod van de Marotte en Groot Vors Harie I vierde zien 11 jaorig jubbelei es lid van De Marotte.
Roger Bormans nuut lid van de Wieze Raod van de Marotte
De 35 jaorige Roger Bormans is al vanaaf ziene jeug betrokke bie de Zittesje Vastelaovend. Es Sjtadsprins Roger I haet hae in 2005 op hoog nivo ervare wat ’t beteikend om de belangriekste persoon van ein Vastelaovessezoen te zeen. Noe 11 jaor later véngk hae ’t ein eer om lid te ware van de Wieze Raod van de Marotte. Roger is medeoprichter en lid van Klup Kump Gout (2004). Dees klup haet ’t inisjatief genomme van de ‘Greutsje Pin’. In 2008 sjtong Roger mit ’t trio Mans Genog (same mit ziene pap Thei Bormans en Maurice Indemans) in de finale van ’t LVK mit ’t leidje ‘Kiek ens hiej’
Roger wilt zich es Marot actief gaon inzette om de eeuwen-awwe Zittesje Vastelaovend mit häör tradieses in sjtadj te hauwte. Om dit te bereike lik ’t häöm gout om te blieve vernuuje, te verjonge en positief kritisch te blieve.
Bénne de Marotte krig Roger om te beginne de taak ’t begeleide van ’t drökwerk en de begeleiding van ’t jaorblaad ‘de Pappegey’. Daonaeve wilt hae de Technische Kemisse wao muigelik gaon ongersjteune.
Jubbelaris Groot-Vors Harie
Groot Vors Harie I (Harry Vanderbroeck) viert dit jaor zien 1×11 jaorig jubbelei, eine tied dae volges häöm is omgevlaoge. In 2006 woort Harie benuimp pés Vors Marot, eine tied mit väöl kontakte mit de zöstervereiniginge oet Kölle en Hasselt. Ouch ein periode mit väöl ceremoniële verplichtinge, zelfs pés bie de toen vicepremier Maxime Verhagen. Of bie ’t oetroupe van Joachim Wüst van de Grosse Kölner pés Ridder in de Orde van de Pappegey. De oetruiping van de nuuje Sjtadsprins bleef jaorliks weier en sjpannend moment. Samegevat eine enerveierende periode mit mer leifs neuge Sjtadsprinse veur De Marotte. Bezunjer waar ouch zien benuimping pés ‘Ehrensenator der Grosse Kölner’.
In 2015 haet hae eine sjtap trök gemaak en woort hae bie zien aafsjeid es Vors Marot benuimp pés Groot Vors. De letste jaore is Harie mee op de achtergrondj, mer nog ummer betrokke bie ’t wel en wee van De Marotte.
Bron: De Marotte Zitterd
Foto’s: Ton Dirkx
