Aafgeloupje jaor is in de kénjeroptoch veur de eesjte keer eine sjpisjale pries oetgereik aan de deilnummer mit ’t sjoonste ‘kerke’. ’t Optochkommitee haop mit deze pries kénjer te sjtimuleiere om mini waages ‘kerkes’ te boewe veur de kénjeroptoch en dat dit eine opsjtap is nao ’t boewe aan de waages veur de groote optoch.
Dit inisjatief wurt dit jaor wiejer oetgebreid. Kartrekkesj zeen twee bekende optochdeilnummesj, Jan Schaekens en Math van Horen.
De kommende waeke waere aspirant boewesj van ‘kerkes’ aktief benaderd via gastlesse op sjoole, ein bezuik aan de optochhal en ein infermasebiejeinkoms sjpisjlaal gerich op ’t boewe van ein ‘kerke’ veur de optoch.
In de optochhal waere wirkmiddige georganizeiert wobie junior-waageboewesj waere biegesjtange door ervare waageboewesj. Daegene dae zelf gein kerke haet ként via ’t Optochkommitee ein in broekleen kriege.
De boewer of boewesj van ’t sjoonste ‘kerke’ van de Kénjeroptoch kriege oet henj van de Sjtadsprins de Eere Winpel ‘Sjoonste kerke’ oetgereik. Taeves maoge de wennesj mittrekke in de groote optoch, ein waek later. Ouch de angere ‘kerkes’ maoge op vriewillige basis mittrekke in de groote optoch, mer zulle dan es eine groote grop ‘boewesj van kerkes’ waere geprizzenteiert.
Kénjer die mit wille doon, allein of mit vrunj, kenne eine e-meel mit hun gegaeves sjikke nao info@optoch.nl. ’t Optochkommite zal dan kontak op numme mit wiejere infermase.
Bron: Optochkommitee Zitterd
Foto: VastelaovendZitterd
